كەز كەلگەن مەملەكەتتىڭ بەرىك ىرگەتاسى – تۇراقتىلىق، ءتارتىپ جانە زاڭ. ءتارتىپ ساقشىلارى وسى ماڭىزدى ءۇشتاعاندى قامتاماسىز ەتۋدە ايرىقشا ءرول اتقارادى. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ: «پوليسيادا جوعارى دايىندىقپەن كەلگەن جانە ءوز ىسىنە شىنايى بەرىلگەن ماماندار جۇمىس ىستەۋى قاجەت. ءتارتىپ ساقشىلارى ازاماتتارعا ۇلگى بولۋعا ءتيىس» دەپ اتاپ وتكەن بولاتىن.
وسى مىندەتتى ابىرويمەن اتقارىپ جۇرگەندەردىڭ ءبىرى – ايدوس سەرىك، الماتى قالاسى پوليسيا دەپارتامەنتى پاترۋلدىك پوليسيا پولكىنىڭ ۆزۆود كومانديرى. ول ءوزىنىڭ ادال ەڭبەگىمەن، جوعارى كاسىبي شەبەرلىگىمەن جانە جاۋاپكەرشىلىگىمەن تانىلىپ، الماتى قالاسى قوعامدىق دامۋ باسقارماسىنىڭ قولداۋىمەن ۇيىمداستىرىلعان «ەڭبەك ادامى» جوباسىنىڭ قاتىسۋشىسى اتاندى.
ايدوس سەرىك 1996 جىلى 9 اقپاندا قاراعاندى وبلىسى، اقتوعاي اۋدانى، سارىشاعان اۋىلىندا دۇنيەگە كەلگەن. اتا-اناسى تەمىرجول سالاسىندا ەڭبەك ەتىپ، ەڭبەكقورلىق پەن جاۋاپكەرشىلىك قاسيەتتەرىن بويىنا سىڭىرگەن. بالا كەزىنەن قۇقىق سالاسىنا قىزىعۋشىلىق تانىتقان ايدوس الماتى ۋنيۆەرسيتەتىندە «قۇقىقتانۋ» ماماندىعى بويىنشا ءبىلىم الىپ، ەڭبەك جولىن قازاقستان قارۋلى كۇشتەرىندە باستادى.
2015 جىلى ول اسكەري قىزمەتىن اياقتاپ، الماتى قالاسى ىشكى ىستەر دەپارتامەنتىنىڭ جول-پاترۋلدىك پوليسيا پولكىنە تاعىلىمداماشى بولىپ قابىلداندى. ءبىر جىلدان كەيىن ول رەسمي تۇردە پوليسيا قىزمەتكەرى بولىپ، قۇقىق قورعاۋ سالاسىنداعى كاسىبي مانسابىن باستادى.
ايدوس سەرىك ءوز قىزمەتىندە زاڭ بۇزۋشىلىقتاردىڭ الدىن الۋمەن عانا ەمەس، ازاماتتاردىڭ قۇقىعىن قورعاۋدا دا ەرەكشە كوزگە ءتۇسىپ كەلەدى. جوعارى كاسىبيلىگى مەن ەڭبەكقورلىعىنىڭ ارقاسىندا ول بىرنەشە لاۋازىمعا كوتەرىلدى:
- الماتى قالاسى پوليسيا دەپارتامەنتى پاترۋلدىك پوليسيا پولكىنىڭ قىزمەت ينسپەكتورى؛
- اعا ينسپەكتور؛
- 2024 جىلدان باستاپ ۆزۆود كومانديرى.
قازىرگى ۋاقىتتا ايدوس قاراماعىنداعى 20 قىزمەتكەرىمەن بىرگە الماتى قالاسىنىڭ قاۋىپسىزدىگىن قامتاماسىز ەتۋ ءۇشىن تاۋلىك بويى جۇمىس ىستەيدى.
«ەلىمىزدىڭ مۇددەسىن قورعاۋ – مەنىڭ باستى مىندەتىم. ءبىز اۋا رايىنا نەمەسە ۋاقىتقا قاراماستان، قوعامدىق ءتارتىپتى ساقتاۋدى قامتاماسىز ەتەمىز. پوليسيا قىزمەتكەرلەرى ءتارتىپ ساقشىلارى دەپ بەكەر اتالمايدى. ءبىزدىڭ جۇمىسىمىز – قۇقىق بۇزىلعان جەردە ازاماتتاردى قورعاۋ جانە قىلمىستىڭ الدىن الۋ،» – دەيدى ايدوس سەرىك.
الماتى قالاسىنىڭ پوليسياسى جىل سايىن 200 مىڭنان استام قوڭىراۋ مەن حابارلامانى وڭدەيدى. قالانىڭ قىلمىستىق ىستەرىنىڭ 60%-ىن «ءىزىن سۋىتپاي» اشۋدا پاترۋلدىك پوليسيا پولكىنىڭ ءرولى ەرەكشە. ايدوس سەرىك وسى باعىتتاعى جۇمىستا ءوزىنىڭ جوعارى كاسىبيلىگىن كورسەتىپ، 9 جىل ىشىندە 3 مىڭنان استام قىلمىستىق جانە اكىمشىلىك قۇقىق بۇزۋشىلىقتىڭ جولىن كەستى.
«كۇندەلىكتى جۇمىس بارىسىندا تۇرعىنداردىڭ العىسىن الۋ – ءبىزدىڭ باستى موتيۆاسيامىز. ءاربىر شىن جۇرەكتەن ايتىلعان العىس ءبىزدىڭ كۇشىمىزدى ارتتىرىپ، سەنىمىمىزدى نىعايتا تۇسەدى. ارينە، جۇمىسىمىز وڭاي ەمەس، ءبىراق مەن ءوز ءىسىمدى سۇيەمىن. بۇل – مەن ءۇشىن تەك ماماندىق ەمەس، ەل يگىلىگى ءۇشىن اتقارىلعان قىزمەت،» – دەيدى ايدوس.
ايدوس سەرىك تەك قىزمەتىمەن عانا ەمەس، جەكە قاسيەتتەرىمەن دە ءوز ورتاسىنا ۇلگى بولۋدا. ونىڭ ادال ەڭبەگى مەن پاتريوتتىق قىزمەتى جاستاردى ءتارتىپ پەن زاڭعا قۇرمەتپەن قاراۋعا شابىتتاندىرادى.
مەملەكەتىمىزدىڭ تىنىشتىعىن قامتاماسىز ەتۋدەگى ەرەن ەڭبەگى ءۇشىن ايدوس سەرىككە العىس بىلدىرەمىز. مۇنداي ەڭبەك ادامدارىنىڭ ارقاسىندا قوعامىمىز ءقاۋىپسىز جانە تۇراقتى بولا تۇسۋدە.