ەڭبەك نارىعىن جان-جاقتى دامىتۋ ءۇشىن ۇكىمەت قىسقا مەرزىمدە 2030 جىلعا دەيىنگى كەشەندى جوسپاردى بەكىتۋى كەرەك. بۇل تۋرالى بۇگىن قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى
«ءبىز بۇعان دەيىن ۋادە بەرگەنىمىزدەي، ۇكىمەت ەڭ تومەنگى جالاقى مولشەرىن بىرتىندەپ وسىرە بەرەدى. ازاماتتاردىڭ تابىسىن ارتتىرۋ ءۇشىن 2024 جىلدىڭ 1 قاڭتارىنان باستاپ ەڭ تومەنگى جالاقى مولشەرىن 85 مىڭ تەڭگەگە كوتەرۋدى تاپسىرامىن. وسىلايشا، ءبىز ەڭبەكاقىنىڭ ەڭ تومەنگى مولشەرىن ءۇش جىل ىشىندە ەكى ەسە كوبەيتتىك»، - دەدى قاسىم-جومارت توقايەۆ.
پرەزيدەنت بۇل شارا 1 ميلليون 800 مىڭ ادامنىڭ، ونىڭ ىشىندە بيۋدجەت سالاسىندا ەڭبەك ەتەتىن 350 مىڭ ازاماتتىڭ ءال-اۋقاتىن ارتتىرۋعا سەپتىگىن تيگىزەتىنىن ايتتى.
«جالپى، ەڭبەك نارىعىن جان-جاقتى دامىتۋ ءۇشىن ۇكىمەت قىسقا مەرزىمدە 2030 جىلعا دەيىنگى كەشەندى جوسپاردى بەكىتۋى كەرەك. جاڭا ەكونوميكالىق ساياساتتىڭ قاعيدالارى مەن باسىمدىقتارىن ناقتى ايقىنداۋمەن قاتار، الداعى رەفورمالاردى ساپالى ءارى تولىق جۇزەگە اسىرۋ وتە ماڭىزدى. ونىڭ تابىستى بولۋى مەملەكەتتىك قىزمەتشىلەردىڭ بىلىكتىلىگىنە، جاۋاپكەرشىلىگىنە جانە ساياسي ەرىك-جىگەرىنە تىكەلەي بايلانىستى»، - دەدى مەملەكەت باسشىسى.