ەلىمىزدە ەلەكتروموبيلدەر سانى ايتارلىقتاي ارتىپ، 65%-دى قۇرادى.
دەيتۇرعانمەن بۇل كورسەتكىش وتە از، سەبەبى ولاردىڭ سانى 800-دەن ءسال اسادى. ياعني، ەلەكتروموبيلدەر وتاندىق اۆتوتۇراقتاردىڭ 0،02% قۇرايدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بيىل جىل باسىندا قازاقستاندا ارالاس جانار-جاعارمايمەن جۇرەتىن 322،4 مىڭ جەڭىل اۆتوكولىك بولدى. بۇل وتكەن جىلمەن سالىستىرعاندا 8،5% ارتىق. مۇنداي اۆتوموبيلدەردىڭ ەلىمىزدەگى جالپى ۇلەسى - 8،2%.
كولىك جاساۋشىلاردىڭ ايتۋىنشا، گيبريدتى اۆتوموبيلدەردىڭ اۋانى لاستاۋ كورسەتكىشى جوعارى.
تاۋەلسىز توپتار جۇرگىزگەن سىناق راستاعانداي، گيبريدتى تيپتەگى كولىكتەر زەرتحانالىق مالىمەتتەرگە قاراعاندا جانار-جاعارمايدى كوبىرەك تۇتىنادى.
ارالاس جانار-جاعارمايمەن جۇرەتىن جەڭىل كولىكتەردىڭ باسىم بولىگى ماڭعىستاۋ وبلىسىندا تىركەلدى. اتالعان وڭىردە 74،3 مىڭ اۆتو بار. بۇل وتكەن جىلمەن سالىستىرعاندا 3،6% ارتىق.
ەكىنشى جانە ءۇشىنشى ورىندا اقتوبە (35،8 مىڭ، 6،4% ارتىق) جانە تۇركىستان (23،1 مىڭ، 27،7% ارتىق) وبلىسى ورنالاسقان.
ال مۇنداي كولىكتەر بويىنشا ازشىلىق ۇلىتاۋ (بارلىعى 229)، اباي (295) جانە جەتىسۋ (409) وبلىستارىنا تيەسىلى. جاعداي اتالعان وبلىستاردىڭ جاقىندا قالىپتاسۋىمەن تۇسىندىرىلەدى.
ەڭ كوپ ەلەكتروموبيل الماتى قالاسىندا تىركەلگەن. ءقازىر قالادا 420 اۆتو بار، ال وتكەن جىلدىڭ باسىندا تەك قانا 43 اۆتوكولىك بولعان. ەكىنشى قاتاردا ورنالاسقان سقو-دا 108 اۆتوكولىك بار. كوشباسشىلاردىڭ ۇشتىگىن ەلوردا جاۋىپ وتىر. وندا بيىل 61 اۆتوموبيل تىركەلگەن، ءبىر جىل بۇرىن 35 بولعان.
Bureau of Transportation Statistics سوڭعى مالىمەتتەرى بويىنشا، 2021 جىلى الەمدە بەنزينمەن جۇمىس ىستەيتىن 799 مىڭ جاڭا گيبريدتى جەڭىل اۆتوموبيلدەر ساتىلدى. بۇل وتكەن جىلمەن سالىستىرعاندا 75،6% كوپ.
قوسىلاتىن ءمودۋلى بار گيبريدتى ەلەكتروموبيلدەردىڭ 173،5 مىڭ داناسى ساتىلدى. جىلدىق ءوسىم - 2،5 ەسە.
ەلەكتروموبيل ساتىلىمى 459،4 مىڭعا دەيىن ارتىپ، الدىڭعى جىلمەن سالىستىرعاندا 92،6% ءوستى.
Heycar مالىمەتتەرى بويىنشا، وتكەن جىلى ەلەكتروموبيلدەر ساتىلىمى 40% ءوستى. ءاربىر ونىنشى جاڭا كولىك ەلەكترلى بولدى.
جاڭا Tesla Model Y 2021 جىلى كوشباسشى بولعان Tesla Model 3-تەن كەيىن بىلتىر ەڭ كوپ ساتىلاتىن ەلەكتروموبيل اتاندى. جالپى العاندا، وتكەن جىلى الەم بويىنشا 1،6 ميلليون جاڭا كولىك تىركەلدى.
كورسەتكىشتى 2021 جىلمەن سالىستىرساق، 2% از. وعان اۆتوونەركاسىپ سالاسىنا پاندەميانىڭ تيگىزگەن تەرىس اسەرى جانە جارتىلاي وتكىزگىش ميكروسحەمانىڭ جاھاندىق جەتىسپەۋشىلىگى سەبەپ بولعان.