تۇركىستان وبلىسى بويىنشا ەڭ جوعارى اۋا تەمپەراتۋراسى قىزىلقۇم اۋىلىندا تىركەلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«قازگيدرومەت» رمك تۇركىستان وبلىسى بويىنشا فيليالىنىڭ مالىمەتىنشە، وڭىردە ەڭ جوعارى اۋا تەمپەراتۋراسى قىزىلقۇم ايماعىندا تىركەلگەن.
«ساعات 15:00-دەگى جاعداي بويىنشا قىزىلقۇمدا 44،2 گرادۋس بولدى. ال، تۇركىستان قالاسىندا – 42،7، شىمكەنتتە – 40 گرادۋس ىستىق تىركەلدى. بۇگىنگى كۇننىڭ ەڭ سوڭعى مالىمەتتەرى ساعات 21:00-دە بەلگىلى بولادى»، - دەلىنگەن سينوپتيكتەردىڭ اقپاراتىندا.
ال، وبلىس تۇرعىندارى الەۋمەتتىك جەلىدە اپتاپ ىستىققا بايلانىستى ءتۇرلى ۆيدەولار تاراتىپ جاتىر. ءبىرى جۇمىرتقانى كۇنگە ءپىسىرىپ ەكسپەريمەنت جاساسا، ەندى ءبىرى كولىگىندەگى ولشەگىشتىڭ كورسەتكىشىن جۇكتەدى. ال، ۆەلوسيپەدپەن جەلدەتكىش الىپ كەتىپ بارا جاتقان تۇرعىننىڭ ارەكەتى كوپشىلىككە كوتەرىڭكى كوڭىل كۇي سىيلادى. ول قۇددى ءبىر ۆەلوسيپەدىنە ۇلكەن جەلدەتكىش قوسىپ العانداي كورىنگەن. جەلى قولدانۋشىلارىنىڭ جازۋىنشا، وقيعا تۇركىستان قالاسىندا ءتۇسىرىلىپتى.
ايتا كەتەيىك، كەشە تۇركىستان وبلىسىندا كۇن رايى 45 گرادۋسقا دەيىن كوتەرىلەتىنىن جازعان بولاتىنبىز.
«قازگيدرومەت» رمك تۇركىستان وبلىسى بويىنشا فيليالىنىڭ مالىمەتىنشە، اپتاپ ىستىقتىڭ ەكپىنى ەرتەڭنەن باستاپ تۇسە باستايدى.