سىبايلاس جەمقورلىققا قارسى قىزمەت ءبىلىم بەرۋ سالاسىنداعى ءىرى جىمقىرۋلاردى تەرگەپ جاتىر. قىلمىستار مەملەكەتتىك اۋديتورلاردىڭ جاسىرۋشىلىعىمەن جاسالعانى قىلمىستىق ىستەردىڭ ماتەريالدارىمەن راستالدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
مىسالى، جەتىسۋ وبلىسىندا بيۋدجەت قاراجاتى "ءولى جانداردىڭ" شوتتارىنا اقشا اۋدارۋ جانە مەكتەپ قىزمەتكەرلەرىنىڭ جالاقىسىن اسىرا ەسەپتەپ، كەيىننەن ولاردى قولما-قول اقشاعا اينالدىرۋ مەن يەمدەنۋ ارقىلى ۇرلانعان.
«تەرگەۋ بارىسىندا الماتى وبلىسى تەكسەرۋ كوميسسياسىنىڭ مەملەكەتتىك اۋديتورى 500 مىڭ تەڭگە سوماسىندا پارا العانى اشكەرەلەندى. ول تالدىقورعان قالاسىنداعى مەكتەپتەردىڭ بىرىندە اۋديتورلىق تەكسەرىستىڭ وڭ قورىتىندىسى ءۇشىن پارا العان. ءقازىر اۋديتور سوتقا تارتىلدى»، - دەدى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى ارمان تلەۋكەنوۆ.
- وسىعان ۇقساس فاكت الماتى وبلىسىندا انىقتالدى. وندا وبلىستىق تەكسەرۋ كوميسسياسى ءبولىمىنىڭ باسشىسى قاراساي اۋدانىنىڭ ءبىلىم ءبولىمىنىڭ بۋحگالتەرىنەن اۋديتورلىق تەكسەرۋدىڭ وڭ ناتيجەلەرى ءۇشىن 1 ملن تەڭگە سوماسىندا پارا العان. وسى فاكتى بويىنشا الماتى وبلىسىنىڭ سىبايلاس جەمقورلىققا قارسى قىزمەتى سوتقا دەيىنگى تەرگەۋ جۇرگىزىپ جاتىر.
- سونىمەن قاتار تۇركىستان وبلىسىندا مەملەكەتتىك ريەۆيزور - وبلىستىق تەكسەرۋ كوميسسياسىنىڭ باس ينسپەكتورى پاراقورلىقپەن اشكەرەلەندى. ول سارىاعاش اۋدانىنداعى مەكتەپتەردىڭ بىرىندە اۋديتورلىق تەكسەرىستىڭ وڭ قورىتىندىسى ءۇشىن 26 ملن تەڭگە كولەمىندە پارا الدى دەگەن كۇدىكتە. كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
«قىلمىستىق-پروسەستىك كودەكسىنىڭ 201-بابىنا سايكەس وزگە دە اقپارات جاريا ەتۋگە جاتپايدى. كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى»، - دەلىنگەن اگەنتتىك حابارلاماسىندا.