الەۋمەتتىك جەلىدە استانا كوشەلەرىنىڭ بىرىندە قويدىڭ قاشىپ جۇرگەنى ءتۇسىپ قالعان ۆيدەو تاراپ جاتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
بىرنەشە سەكۋندتىق ۆيدەودان بايقالعانداي قوي كوشە ورتاسىندا كولىكتەردىڭ اراسىندا قاشىپ ءجۇر. كورىنىسكە قاراعاندا ۆيدەو ەلورداداعى ەسىل وزەنىنىڭ سول جاعالاۋىندا، قابانباي باتىر كوشەسى بويىندا تۇسىرىلگەن.
ايتا كەتەيىك، بۇگىننەن باستاپ مۇسىلمان قاۋىم قۇربان ايتتى مەرەكەلەپ جاتىر. مەيرام 11 شىلدەگە دەيىن جالعاسادى. اتالعان مەرەكەگە ءتان مىندەتتىڭ ءبىرى – قۇربان شالۋ جانە قۇرباندىققا شالاتىن مالعا، ونى سويۋعا قاتىستى قويىلاتىن تالاپتار. قازاقستاندىقتاردىڭ Qurban2022.kz سايتى ارقىلى ءوتىنىم بەرە وتىرىپ، ونلاين رەجيمدە دە قۇرباندىق شالۋعا مۇمكىندىگى بار.
ەسكە سالا كەتسەك، ەلىمىزدىڭ سانيتاريالىق-ەپيدەميولوگيالىق باقىلاۋ كوميتەتى ساقتىق شاراسى ماقساتىندا قۇرباندىققا ۆەتەرينارلىق انىقتاماسى بار مالدى عانا سويۋدى ۇسىندى.