سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين «ارسەلورميتتال تەمىرتاۋ» كومپانياسىنداعى اپاتتاردى ازايتۋ جولدارىن اقپاراتتىق تەحنولوگيادان ىزدەۋ كەرەكتىگىن ايتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«بۇگىن پرەمەر-مينيسترمەن بىرگە قاراعاندى وبلىسىندا ىس-ساپارمەن بولدىم. IT-نارىعىن دامىتۋ، بايلانىس ساپاسىن جاقسارتۋ، ونەركاسىپ سەكتورىندا سيفرلىق ترانسفورماسيالاۋدى قولدانۋ پروسەستەرى تۋرالى اقپاراتپەن ءبولىستىم. اتاپ ايتقاندا، «ارسەلورميتتالداعى» وندىرىستىك نىسانداردى ارالاي وتىرىپ، ءاليحان اسحانۇلىنا وندىرىستىك پروسەستەردى سيفرلاندىرۋعا جانە كاسىپورىنداردا قاۋىپسىزدىكتى قامتاماسىز ەتۋگە ىقپال ەتە الاتىن 5G تەحنولوگياسىنىڭ مۇمكىندىكتەرى تۋرالى باياندادىم» دەپ جازدى مينيستر Facebook پاراقشاسىندا.
ونىڭ ايتۋىنشا، ۇكىمەت باسشىسى «ارسەلورميتتال» كاسىپورنىنا 5G جەلىلەرى نەگىزىندە ۇزدىك تاجىريبەلەردى قولدانا وتىرىپ، جەدەل تۇردە سيفرلاندىرۋ جۇمىستارىن جۇرگىزۋگە ناقتى تاپسىرما بەرگەن.
«مىسالى، «اقىلدى كاسكالار» جۇيەسىن ەنگىزۋ ارقىلى شاحتالارداعى جۇمىسشىلاردىڭ ورنالاسقان جەرىن انىقتاۋعا بولادى، بۇل جۇيە ولاردىڭ ديسپەچەرلەرمەن تۇراقتى بايلانىسىن قامتاماسىز ەتەدى جانە شاحتالاردا بولىپ جاتقان وقيعالار تۋرالى ونلاين رەجيمدە ۇزدىكسىز اقپارات بەرە الادى. بۇل جۇمىسكەرلەردىڭ ءومىرىن ساقتاپ قالۋعا جانە جاراقاتتانۋىن ازايتۋعا باعىتتالعان ءبىر عانا مىسال. سيفرلاندىرۋدىڭ ارقاسىندا كوپتەگەن ماڭىزدى پروسەستەردى وزگەرتۋگە جانە وندىرىستەگى ادامداردىڭ ءومىرىن قورعاۋعا بولادى» دەپ اتاپ ءوتتى باعدات مۋسين.
ايتا كەتەيىك، سوڭعى 15 جىلدا «ارسەلورميتتال تەمىرتاۋ» زاۋىتتارىندا 100-دەن استام جۇمىسشى قازا تاپقان.