نۇر-سۇلتان قالاسىندا قۇرىلىسى باستالىپ، اياقسىز قالعان LRT باعاندارىن بۇزىپ جاتىر دەگەن اقپارات – جالعان
بۇل تۋرالى City Transportation Systems كومپانياسىنىڭ رەسمي وكىلى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىن الەۋمەتتىك جەلىلەردە «LRT كونسترۋكسيالارىن بۇزىپ جاتىر» دەگەن ۆيدەو كەڭ تاراپ كەتتى. وسىعان وراي تارالعان ۆيدەونىڭ وتكەن جىلى تۇسىرىلگەنىن رەسمي تۇردە حابارلايمىز. اتالعان بەينەجازبادا قىتايلىق كونسورسيۋم جالداعان تەحنيكانىڭ جۇمىسى بەينەلەنگەن. بۇل تەحنيكا قۇرىلىسقا قاجەت بورەنەلەرگە ارنالعان تەحنولوگيالىق نەگىزدى (الاڭدى) تالداۋ ءۇشىن جالدانعان. ەلوردادا LRT قۇرىلىسىن دەمونتاجداۋ بويىنشا ەشقانداي جۇمىس ءجۇرىپ جاتقان جوق»، - دەدى اتالعان كومپانيانىڭ قوعاممەن بايلانىس ءبولىمىنىڭ جەتەكشىسى ناۋات ازانبايەۆا.
ايتا كەتسەك، بىلتىر CTS كومپانياسى LRT قۇرىلىسىنىڭ الاڭىندا قۇرىلىس-مونتاجداۋ جۇمىستارىنا دايىندىق باستالعانىن حابارلاعان ەدى.
ەسكە سالساق، 2021 جىلى مامىر ايىندا اتالعان جوباعا بولىنگەن 6 ملرد تەڭگەگە جۋىق قارجىنى تالان-تاراجعا سالدى دەگەن ايىپ تاعىلعان بىرنەشە ازامات 7-10 جىلعا سوتتالعان بولاتىن.