كونسەرت ەلوردا اكىمدىگىنىڭ قولداۋىمەن ۇيىمداستىرىلدى
ەلوردالىق «استانا» كونسەرت زالىندا حالىق ءارتىسى، انشى-كومپوزيتور ەسكەندىر حاسانعالييەۆتى ەسكە الۋعا ارنالعان «ساعىندىم سەنى» كونسەرتى ءوتتى. ءىس-شارا ەركەعالي راحمادييەۆ اتىنداعى مەملەكەتتىك اكادەميالىق فيلارمونيانىڭ ۇرمەلى وركەسترىنىڭ XXI كونسەرتتىك ماۋسىمىنىڭ اشىلۋىنا ورايلاستىرىلدى، دەپ حابارلايدى Almaty-akshamy.kz نۇر-سۇلتان اكىمدىگىنىڭ رەسمي سايتىنا سىلتەمە جاساپ.
بەلگىلى قازاقستاندىق انشى-كومپوزيتور، مەملەكەتتىك سىيلىقتىڭ لاۋرەاتى، قازاق كسر حالىق ءارتىسىن ەسكە الۋعا ارنالعان مۋزىكالىق كەشتە ارتىستەر ەسكەندىر حاسانعالييەۆتىڭ رەپەرتۋارىنان اندەر ورىندادى.
كەشتىڭ قۇرمەتتى قوناعى رەتىندە ونىڭ جارى داريكو حاسانعالييەۆا مەن ۇلى ءبىرجان حاسانعالييەۆ قاتىستى.
«ەلوردا اكىمدىگىنە، سول سياقتى ۇيىمداستىرۋشىلارعا ەسكەندىر حاسانعالييەۆتىڭ شىعارماشىلىعىن قۇرمەتتەپ، وسىنداي رۋحاني كونسەرتتى وتكىزگەنى ءۇشىن ەرەكشە العىسىمدى بىلدىرەمىن. حالىق ونەر مەن شىعارماشىلىقتى باعالاعان كەزدە بەلگىلى كومپوزيتوردىڭ ەسىمى وشپەيتىنىنە سەنىمدىمىن»، - دەپ اتاپ ءوتتى حالىق ءارتىسى داريكو حاسانعالييەۆا.
كومپوزيتور حالقىمىزدىڭ ءان ونەرىنە ۇلكەن ۇلەس قوستى. ونىڭ اۆتورلىق شىعارمالارى جۇرت ەسىندە ماڭگى ساقتالماق. ول قازاق، ورىس، تاتار، نەمىس اقىندارىنىڭ ولەڭدەرىنە كوپتەگەن ءان جازدى. سونىمەن قاتار 200-گە جۋىق ءان، رومانس جانە حور شىعارمالارىن قويدى. ەسكەندىر حاسانعالييەۆكە دەگەن قازاق حالقىنىڭ قۇرمەتى ىلعي دا ەرەكشە بولىپ قالا بەرەرى ءسوزسىز.
كونسەرتتە ۇرمەلى اسپاپتار وركەسترىنىڭ سۇيەمەلدەۋىمەن ق ر ەڭبەك سىڭىرگەن ءارتىسى مايرا ءىلياسوۆا، قازاقستاننىڭ ەڭبەك سىڭىرگەن قايراتكەرلەرى سۆەتلانا ايتبايەۆا، سۇندەت بايعوجين، التىناي جورابايەۆا، مارجان اراپبايەۆا، ارايلىم راحىم قىزى، حالىقارالىق بايقاۋلاردىڭ لاۋرەاتتارى ايدىن جۇمابايەۆ، نۇربول بالاپانوۆ، ايگەرىم وراز، پاراسات وتان، تالعات اللابيرينوۆتار، اقبوتا قۇسنادين، اكىمحان ماجەنوۆ، مۇراتبەك حايرولدا، نۇربول بالاپانوۆ، باقداۋلەت جاقىپوۆ، ارۋجان قويشىقارا جانە «Alem» ەسترادالىق بي ءانسامبلى، ۇلتتىق ۇلاننىڭ «قۇرمەت» قاراۋىل روتاسى ونەر كورسەتتى.
ورىنداۋشىلار كومپوزيتوردىڭ «اتامەكەن»، «ەسىرمەگەن ماحاببات»، «ادەمى-اۋ»، «تۋعان جەر»، «ەلىمىم ەركەم» اندەرى حالىق جادىندا ماڭگى ساقتالاتىنىن اتاپ ءوتتى.
ءىس-شارا سانيتارلىق نورمالار مەن كارانتين تالاپتارىن ساقتاي وتىرىپ ءوتتى.