قازاقستان بالۋاندارىنىڭ قورجىنىندا 8 مەدال بار
11 ساۋىردە كۇرەستەن ازيا چەمپيوناتىندا ايەلدەر اراسىندا جەكپە-جەك باستالدى. قازاقستان بەس سالماق دارەجەسىندە ونەر كورسەتىپ، اراسىندا تەك ەلميرا سىزدىقوۆا عانا جارىستىڭ «التىنى» ءۇشىن جۇدىرىقتاسۋعا مۇمكىندىك الدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
76 كەلى سالماقتا فينالعا شىعۋى ءۇشىن قازاقستان ايەلدەر قۇراماسى كوشباسشىلارىنىڭ ءبىرى ەلميرا سىزدىقوۆا قىتايلىق جۋان ۆاندى 6:4 ەسەبىمەن جەڭدى. ەندى ازيا-2023 چەمپيونى اتاعى ءۇشىن شەشۋشى بەلدەسۋدە ول قىرعىزستان وكىلى ايپەري مەدەتقىزىمەن كۇرەسەدى. فينال 11 ءساۋىر كۇنى استانا ۋاقىتىمەن 18:00-دەن كەيىن وتەدى.
سونىمەن قاتار قازاقستاننىڭ كۇرەس جانكۇيەرلەرى ازيا چەمپيوناتىنىڭ قولا جۇلدەسىن ساراپقا سالاتىن تاعى ەكى سپورتشىمىزعا قولداۋ كورسەتە الادى. الدىمەن كىلەمگە مارينا سەدنيەۆا (55 كەلى) كوتەرىلسە، ونىڭ 3-ورىن ءۇشىن بەلدەسۋدەگى قارسىلاسى نگۋەن تي ماي ترانگ (ۆەتنام) بولادى. 59 كەلى سالماقتاعى ديانا كايۋموۆا قولا جۇلدە ءۇشىن قىرعىزستاندىق قالميرا بىلىمبەكقىزىمەن كۇش سىناسادى.
ازيا چەمپيوناتىنىڭ ەكىنشى كۇنىنەن كەيىن قازاقستان بالۋاندارىنىڭ قورجىنىندا 8 مەدال بار. ولاردى گرەك-ريم كۇرەسىنىڭ بالۋاندارى جەڭىپ الدى. يبراگيم ماگومادوۆ التىن، دياس قالەن مەن نۇرسۇلتان تۇرسىنوۆ كۇمىس، المات كەبىسبايەۆ، ولجاس سىرلىباي، امانعالي بەكبولاتوۆ، مۇحامەدالى مامىربەك جانە ءالىمحان سىزدىقوۆ قولا جۇلدەگەر اتاندى.