2000-عا جۋىق مامان دايىندالدى
وسى ۋاقىتقا دەيىن كىشى بۋىن ماماندارىن دايارلايتىن مامانداندىرىلعان وقۋ-جاتتىعۋ ورتالىعىنان 2000-عا جۋىق مامان ءبىلىم الىپ شىقتى، دەپ حابارلايدى Almaty-akshamy.kz.
سالتاناتتى شارا الماتى گارنيزونىنىڭ 03825 اسكەري بولىمىندە ءوتتى. جىل سايىن بايلانىس وقۋ-جاتتىعۋ ورتالىعىندا شامامەن 200-گە جۋىق ادام وقىپ شىعادى. ولارعا اسكەرگە قاجەتتى «3-سىنىپتى مامان»، ال ازاماتتىق سالا بويىنشا – «2-رازريادتى ەلەكتر مونتەر مامانى» سىنىپتىق بىلىكتىلىگى بەرىلەدى. ورتالىقتىڭ تۇلەكتەرى ءقازىردىڭ وزىندە بولىمشەلەرگە ءبولىنىپ، ءتيىستى ماماندىقتار بويىنشا مىندەتتەرىن ورىنداۋعا كىرىستى.
اسكەري ءبولىمنىڭ كومانديرى، پودپولكوۆنيك اسحات ۇلىبايەۆ وقۋ پروسەسىنىڭ اياقتالۋىمەن جانە جاۋىنگەرلەردىڭ بايلانىس كىشى مامانى بىلىكتىلىگىن الۋىمەن قۇتتىقتاپ، بىلاي دەدى:
– جۇمىلا العا قويعان جاڭا ماقساتتارىڭا جەتىپ، ەلىمىزدىڭ وسىپ-وركەندەۋىنە، قورعانىسىمىزدىڭ مىعىم بولۋىنا ۇلەس قوسىپ، امان-ەسەن جاۋىنگەرلىك داستۇرگە ساي قۇندىلىقتاردى ساقتاپ، ەگەمەن قازاقستاننىڭ يگىلىگى جولىندا قاناتتارىڭ تالماي، سامعاي بەرىڭدەر!
2013 جىلى ق ر قورعانىس مينيسترلىگىنىڭ باسشىلىعى كىشى بۋىن ماماندارىن دايارلايتىن مامانداندىرىلعان وقۋ ورتالىعىن قۇرۋ تۋرالى شەشىمدى قابىلداعانىن ايتا كەتەلىك. سودان بەرى بۇل جەردە 2000-عا جۋىق مامان دايىندالدى. مۇنداي ورتالىقتا نەگىزىنەن مەرزىمدى قىزمەتتەگى ساربازدار وقيدى.
– اسكەردەگى بورىشىڭدى وتەگەن سوڭ جۇمىسقا ورنالاسۋ مۇمكىندىگى كەڭەيتەتىنىنە قۋانىشتىمىن. جاڭا قازاقستاندا بايلانىس وقۋ ورتالىعىن بىتىرگەن ماماندار قاجەت دەپ ويلايمىن، – دەيدى قاتارداعى جاۋىنگەر بەكزات قالدىبەك.
وقۋدى اياقتاعان ساربازداردىڭ قولىنا ەكى ءتۇرلى سەرتيفيكات بەرىلەدى، ولار ارمياداعى قىزمەتىن اياقتاعاننان كەيىن بۇل ماماندىقپەن ازاماتتىق سالادا جۇمىس تابا الادى نەمەسە كەلىسىمشارت بويىنشا قىزمەتكە قالۋىنا تىكەلەي مۇمكىندىك بەرەتىن قۇجات بولىپ تابىلادى.
بۇرىن دا ايتىپ وتكەنىمىزدەي، مەرزىمدى اسكەري قىزمەتتى وتكەرۋ بارىسىندا جاس قازاقستاندىقتار ەكونوميكانىڭ ناقتى سەكتورىندا سۇرانىسقا يە اۋىر جۇك ماشينالارىنىڭ، ەكسكاۆاتورلاردىڭ جۇرگىزۋشىلەرى، تراكتورشىلار، جول سالاتىندار، ديزەليست-ەلەكتريكتەر جانە باسقا دا ماماندىقتاردى الىپ شىعادى.