وقۋ-اعارتۋ ءمينيسترى عاني بەيسەمبايەۆ ەلىمىزدىڭ ۇزدىك پەداگوگتەرىمەن، ارداگەر ۇستازدارمەن ونلاين فورماتتا كەزدەسۋ وتكىزدى. اشىق ديالوگ الاڭىنا اينالعان بۇل جيىن قازىرگى ءبىلىم بەرۋ جۇيەسىندەگى جانە قوعامداعى ءمۇعالىمنىڭ ءرولىن تالقىلاۋعا ارنالدى.
كەزدەسۋگە ەلىمىزدىڭ بارلىق وڭىرىنەن 100-گە جۋىق پەداگوگ قاتىستى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
ولاردىڭ اراسىندا «قازاقستاننىڭ ەڭبەك ەرى»، «قازاقستاننىڭ ەڭبەك سىڭىرگەن ۇستازى» اتاقتارىنا يە ۇستازدار دا بار. بۇگىندە ءبىلىم بەرۋ سالاسىندا 5 «ەڭبەك ەرى» مەن 74 «قازاقستاننىڭ ەڭبەك سىڭىرگەن ۇستازى» ەڭبەك ەتۋدە. سونىمەن قاتار جىل سايىن وتكىزىلەتىن «ۇزدىك پەداگوگ» رەسپۋبليكالىق بايقاۋىنىڭ 700-دەن استام جەڭىمپازى بار.
قازاقستان پەداگوگ مارتەبەسىن كوتەرۋ ماقساتىندا ءتۇرلى مەملەكەتتىك قارجىلىق قولداۋ تەتىكتەرىن ەنگىزگەن ساناۋلى ەلدەردىڭ ءبىرى. مەملەكەتتىك ماراپات يەگەرلەرى، ۇزدىك پەداگوگتەر جانە شاكىرتى حالىقارالىق وليمپيادالاردا ۇزدىك ناتيجە كورسەتكەن مۇعالىمدەرگە 1000 اەك كولەمىندە سىياقى قاراستىرىلعان.
«مەملەكەت باسشىسى ۇستازدىڭ ءرولىن قوعامنىڭ باستى كەيىپكەرى رەتىندە ايقىنداپ بەردى. پەداگوگتىڭ ەڭبەگى لايىقتى باعالانىپ، ونى قولداۋ – مەملەكەتتىڭ باسىم باعىتتارىنىڭ بىرىنە اينالدى. ەندىگى ماقسات – وسى يگى باستامالاردى جالعاستىرىپ، مۇعالىمدەر اراسىندا اعارتۋشىلىق پەن زيالىلىق ساباقتاستىعىن ساقتاۋ. مەملەكەت ماراپاتىنا يە بولعان ۇستازدار ۇلتتىڭ ماقتانىشىنا اينالۋى كەرەك. ءبىز ولاردى التى الاشتىڭ تورىنە شىعارۋ ارقىلى بۇكىل پەداگوگتەرگە ۇستاز ەڭبەگىنىڭ لايىقتى باعالاناتىنىن كورسەتىپ، جەتىستىككە جەتۋگە ىنتالاندىرامىز»، – دەدى عاني بەيسەمبايەۆ.
جيىن بارىسىندا قازاقستاننىڭ ەڭبەك ەرلەرى گۇلجانار نۇرپەيىسوۆا، الما شۇكىجانوۆا، «قازاقستاننىڭ ەڭبەك سىڭىرگەن ۇستازى» ناعيشا ەسبوسىن جانە «ەڭبەك ارداگەرى» ورىنشا قارابالينا ءسوز سويلەپ، ءوز تاجىريبەلەرىمەن ءبولىستى.
«مەنىڭ 54 جىلدىق عۇمىرىم مەكتەپ قابىرعاسىندا ءوتتى. مەملەكەت باسشىسىنىڭ ۇستازعا دەگەن قامقورلىعى – بۇل بىزگە ارتىلعان سەنىم مەن جاۋاپكەرشىلىك. ۇستاز ءۇشىن ەڭ ۇلكەن ماراپات – شاكىرتىنىڭ جەتىستىگى. سەبەبى ۇستاز بولۋ – تەك ءبىلىم بەرۋ ەمەس، ەل بولاشاعىن تاربيەلەۋ»، – دەيدى 93 جاستاعى ارداگەر ۇستاز ورىنشا قارابالينا.
كەزدەسۋ سوڭىندا مينيستر ءبىلىم باسقارمالارىنا ۇزدىك ۇستازداردى مەكتەپتەرگە تالىمگەر رەتىندە تارتۋدى تاپسىردى. سونداي-اق، جاس مۇعالىمدەرگە باعىت-باعدار بەرۋ ماقساتىندا تاجىريبە الماسۋ الاڭدارىن ۇيىمداستىرۋ قاجەتتىگىن ايتتى.
ايتا كەتەيىك، قازىرگى تاڭدا مينيسترلىكتىڭ باستاماسىمەن ءبىلىم بەرۋ ۇيىمدارىندا «قازاقستاننىڭ ەڭبەك ەرى» جانە «قازاقستاننىڭ ەڭبەك سىڭىرگەن ۇستازى» اتانعان پەداگوگتەردىڭ فوتوگالەرەيالارى اشىلۋدا.