الاياقتاردىڭ مەكەنجايىنان 60 ازاماتتىڭ جسن، ءاتى-جونى جازىلعان ءتىزىم تابىلعان.
قىزىلوردالىق پوليسەيلەر ەلىمىزدىڭ ءۇش قالاسىندا ينتەرنەت-الاياقتار توبىن قولعا ءتۇسىردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
وسى جىلدىڭ ءساۋىر ايىنان باستاپ قىزىلوردا وبلىسى پوليسيا دەپارتامەنتىنىڭ قىزمەتكەرلەرىنىڭ تالايدى سان سوقتىرعان ينتەرنەت الاياقتاردى قۇرىقتاۋ بويىنشا جۇرگىزىلگەن ارنايى ءىس-شاراسى ءساتتى اياقتالدى. جەڭىل جولمەن اقشا تابۋدى ماقسات ەتكەن اككى الاياقتار قولعا ءتۇستى.
ەستەرىڭىزدە بولسا، وڭىرىمىزدە وتكەن جىلدىڭ قاراشا ايىنان باستاپ تۇرعىندارعا بەلگىسىز بىرەۋلەر تەلەفون ارقىلى حابارلاسىپ، «جاقىنىڭ ەسىرتكى زاتىمەن ۇستالىپ تۇر، ونى جازادان بوساتۋ ءۇشىن ءبىز ايتقان ەسەپشوتقا دەرەۋ قاراجات اۋدارۋىڭىز كەرەك» دەپ ۇرەيلەندىرىپ، الاياقتىق جولمەن قاراجاتتارىن جىمقىرىپ كەلگەن قىلمىسكەرلەر پايدا بولعان ەدى.
وسى كۇنگە دەيىن ۇقساس فاكتىلەر بويىنشا وبلىس اۋماعىندا 32 قىلمىستىق ءىس تىركەلىپ، جابىرلەنۋشىلەرگە كەلتىرىلگەن شىعىن كولەمى 24 ميلليون تەڭگەگە جۋىقتادى. اككى الاياقتاردىڭ قىلمىستىق ىس-ارەكەتتەرىن اشكەرەلەۋ ماقساتىندا پوليسيا دەپارتامەنتىنىڭ بىلىكتى قىزمەتكەرلەر قاتارىنان جەدەل تەرگەۋ توبى قۇرىلىپ، تەرگەۋ امالدارى باستالدى. تەرگەۋ ناتيجەسى جيناقتالعان ايعاقتار ارقىلى الاياقتىق تاسىلدەردىڭ دالمە-دال ۇقساستىعىن جانە بۇل قىلمىستاردىڭ بارلىعىن بەلگىلى ءبىر قىلمىستىق توپتىڭ جاساعانىن كورسەتتى.
جەدەل تەرگەۋ توبى الاياقتاردىڭ ىس-ارەكەتتەرىن دالەلدەيتىن ايعاقتاردىڭ جەتكىلىكتى دەڭگەيدە جينالعاندىعىن نازارعا الا وتىرىپ، 15 شىلدە كۇنى ءبىر مەزەتتە ەلىمىزدىڭ ءۇش وبلىسىندا، ياعني الماتى، اقتوبە جانە جامبىل وبلىستارىندا ارنايى ءىس-شارا وتكىزدى. ءىس-شارا بارىسىندا ءار وبلىستا بىر-بىرىمەن سىبايلاسۋ ارقىلى الاياقتىقپەن اينالىسىپ كەلگەن 8 ادامنان قۇرالعان قىلمىستىق توپ قۇرىقتالدى.
الاياقتاردىڭ مەكەنجايىن ءتىنتۋ بارىسىندا قىلمىس قۇرالى رەتىندە قولدانىلعان 17 ۇيالى تەلەفون، بەيتانىس تۇلعالاردىڭ اتىنا جاسىرىن تىركەلگەن 15 ابونەنتتىك نومىرلەر، 60 ازاماتتىڭ جسن، ءاتى-جونى جازىلعان ءتىزىم، اقشا اينالىمدارىن تىركەگەن بلوكنوت انىقتالىپ، ايعاق زات رەتىندە تاركىلەندى.
وسىلايشا جۇرتشىلىقتىڭ ماڭداي تەرىمەن تيىنداپ جيناعان قاراجاتىن ارباپ الىپ، باس پايداسىنا جاراتۋعا دانىككەن اككى ينتەرنەت-الاياقتاردىڭ جولى كەسىلدى. قازىرگى ۋاقىتتا بۇل قىلمىستىق توپتىڭ وزگە دە وڭىرلەردە ورىن العان الاياقتىق قىلمىستارىنا قاتىستىلىعى تەكسەرىلۋدە.