قىتايدىڭ ءۇرىمشى قالاسىندا قازاقستان مەن قىتايدىڭ تۋريستىك الەۋەتىن ىلگەرىلەتۋ جانە تۋريزم سالاسىنداعى ىنتىماقتاستىقتى نىعايتۋ ماقساتىندا ەكى ەل اراسىنداعى تۋريستىك فورۋم ءوتتى.
فورۋمعا ق ر تۋريزم جانە سپورت مينيسترلىگى، «اتامەكەن» ۇكپ جانە جەرگىلىكتى اتقارۋشى ورگانداردىڭ، تۋريستىك كومپانيالاردىڭ، تۋريستىك يندۋستريا قاۋىمداستىقتارىنىڭ وكىلدەرى، سونداي-اق قازاقستان مەن قىتايدىڭ ب ا ق وكىلدەرى قاتىستى، دەپ حابارلايدى اlmaty-akshamy.kz.
قاتىسۋشىلار ەكى ەل اراسىنداعى ءتۋريزمدى دامىتۋ پەرسپەكتيۆالارىن تالقىلاپ، تۋريستەردى تارتۋ بويىنشا تاجىريبە مەن يدەيا الماستى، سونداي-اق جاڭا تۋريستىك مارشرۋتتار قۇرۋ مۇمكىندىكتەرىن قاراستىردى. فورۋم اياسىندا ەكى ەلدىڭ تۋريستىك كومپانيالارى مەن ۇيىمدارى اراسىنداعى ىنتىماقتاستىق تۋرالى ءبىرقاتار كەلىسىمگە قول قويىلدى. بۇل ءوز كەزەگىندە تۋريستىك سالانىڭ دامۋىنا جانە قازاقستان مەن جۇڭگو اراسىنداعى تۋريستەر اعىنىنىڭ ارتۋىنا ىقپال ەتەدى. فورۋمداعى ءسوز سويلەۋى بارىسىندا ق ر تۋريزم جانە سپورت مينيسترلىگى تۋريزم يندۋسترياسى كوميتەتى ءتوراعاسىنىڭ م.ا. نۇرتاس كارىپبايەۆ قىتايدان قازاقستانعا كەلەتىن تۋريستەر سانى ءوسىپ كەلە جاتقانىنا جانە ەلدەرىمىز اراسىندا وسى سالانى ودان ءارى دامىتۋ ءۇشىن كەدەرگىلەردىڭ بولماۋىنا نازار اۋداردى. سونداي-اق وسى سالاداعى ينۆەستيسيالىق قىزمەتتى كۇشەيتۋ ءۇشىن شەتەلدىك قوناقتار مەن سەرىكتەستەردى تارتۋ ماقساتىندا قازاقستاننىڭ تۋريستىك مۇمكىندىكتەرىن تانىستىردى. اتالعان تۋريستىك فورۋمنىڭ «قىتايداعى قازاقستان ءتۋريزمى جىلى» قارساڭىندا وتكىزىلگەنى ماڭىزدى قادام بولدى. 28-29 ناۋرىزدا بەيجىڭدە «قىتايداعى قازاقستان ءتۋريزمى جىلىنىڭ» اشىلۋ ءراسىمى، ال جىل ىشىندە تۋريزم تۇرلەرى بويىنشا ءبىرقاتار تاقىرىپتىق اپتالار وتكىزۋ، قىتايدىڭ 7 ءىرى قالاسىندا (بەيجىڭ، سيان، شانحاي، ءۇرىمشى، گونكونگ، حانچجوۋ، چەندۋ) توپ-20 وتاندىق دەستيناسيالاردىڭ تۇساۋكەسەرى جوسپارلانعان.
