بۇل بۇگىن وتكەن ۇكىمەت وتىرىسىندا دەنساۋلىق ساقتاۋ ءبىرىنشى ۆيسە-مينيسترى مارات شورانوۆتىڭ ايتقانى.
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
دەنساۋلىق ساقتاۋ ءبىرىنشى ۆيسە-مينيسترى مارات شورانوۆ قازاقستانداعى سانيتارلىق-ەپيدەميولوگيالىق جاعداي جاقسارىپ كەلە جاتقانىن ايتتى. الەمدە كۆي-دىڭ 248 ملن استام جاعدايى تىركەلگەن، تاۋلىگىنە 300 مىڭنان استام جاعداي تىركەلەدى. 5 ملن استام ادام قايتىس بولدى. دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا ايماعىنىڭ دەرەكتەرى بويىنشا سوڭعى ەكى اپتادا 54 ەلدىڭ 45-ىندە سىرقاتتانۋدىڭ ءوسۋى بايقالادى. سوڭعى 14 كۇندە سىرقاتتانۋ ۆەنگريادا بارىنشا ۇلعايعان، وندا اۋرۋ 230%-دان ارتىق، پولشادا – 200%-دان ارتىق، اۆستريادا – 100%-دان ارتىق، ازەربايجان جانە گەرمانيادا – 80%-دان ارتىق وسكەن. سىرقاتتانۋدىڭ ءوسۋى ەۋروپا ددسۇ-نىڭ 9 ەلىندە تومەندەدى، ونىڭ ىشىندە يزرايلدە 57%-عا، تۇركيادا 9%-عا، يسپانيادا 7%-عا.
«قازاقستاندا سوڭعى ەكى اپتادا اۋرۋ 11%-عا تومەندەدى. الەمدىك رەيتينگكە سايكەس 222 ەلدىڭ ىشىندە قازاقستان سىرقاتتانۋ كورسەتكىشى بويىنشا 105 ورىندا، ءولىم-جىتىم كورسەتكىشى بويىنشا 102 ورىندا تۇر»، — دەدى مارات شورانوۆ.
بۇگىنگى كۇنى ەلىمىزدە جاسىل ايماقتا 9 ءوڭىر بار: جامبىل، ماڭعىستاۋ، قىزىلوردا، تۇركىستان، اقتوبە، باتىس قازاقستان، اتىراۋ، الماتى وبلىستارى جانە شىمكەنت قالاسى. قازاقستان رەسپۋبليكاسى جانە 4 ءوڭىر – سارى ايماقتا (شىعىس قازاقستان، قاراعاندى وبلىستارى، الماتى جانە نۇر-سۇلتان قالالارى). قىزىل ايماقتا 4 ءوڭىر (اقمولا، قوستاناي، پاۆلودار جانە سولتۇستىك قازاقستان وبلىستارى). رەپرودۋكتيۆتىلىك سانى – 0،93. ۆيسە-مينيستردىڭ ايتۋىنشا، جالپى قازاقستاندا سوڭعى ەكى ايدا سىرقاتتانۋ 2،8 ەسە، ال ءولىم-جىتىم 4،1 ەسە ازايدى. مەكتەپكە ءداستۇرلى فورماتتا باراتىن وقۋشىلار اراسىندا 15 028 جاعداي تىركەلدى، ونىڭ ىشىندە اۋرۋدى جۇقتىرعاندارمەن بايلانىستا بولعاندار اراسىندا 1 317 ناۋقاس انىقتالدى، بۇل اۋىرعان وقۋشىلاردىڭ جالپى سانىنىڭ 8،7% دەيىنگىنى قۇرايدى. قازان ايىنىڭ سوڭعى ەكى اپتاسىندا وقۋشىلار اراسىندا سىرقاتتانۋ 1،3 ەسە تومەندەدى. سونىمەن قاتار پاۆلودار، اقمولا، ماڭعىستاۋ، تۇركىستان وبلىستارىندا سىرقاتتانۋدىڭ 1،4 ەسەگە دەيىن ءوسۋى بايقالادى.
«اۋرۋ وشاقتارىندا 159 مىڭ اۋرۋدى جۇقتىرعاندارمەن بايلانىستا بولعاندار انىقتالدى، ونىڭ ىشىندە 0،8%-ىندا كوۆيدتىڭ وڭ ناتيجەسى انىقتالدى. رەسپۋبليكا بويىنشا 1 تامىزدان باستاپ ينفەكسيالىق توسەك-ورىن جۇكتەمەسى 56%-دان 33%-عا دەيىن، رەانيماسيالىق توسەك-ورنى جۇكتەمەسى 45%-دان 27%-عا دەيىن تومەندەدى. رەزەرۆتە 30 مىڭنان استام توسەك-ورىن بار»، — دەدى ۆيسە-مينيستر.
ەمدەۋدى جالعاستىرۋشىلار سانى ازايدى، سوڭعى ءۇش ايدا ناۋقاستار سانى 2 ەسە ازايدى. حالىقتى كۆي-گە قارسى ۆاكسينالاۋ جالعاسۋدا.
«ۆاكسينانىڭ 1-كومپونەنتىن 8،3 ملن استام ادام الدى، ياعني ەكپە الۋى ءتيىس حالىقتىڭ 73،4%-ى نەمەسە جالپى حالىقتىڭ 44،3%-ى قامتىلدى، ەكىنشى كومپونەنتىن 7،6 ملن جۋىق ادام الدى، ياعني ەگىلۋگە ءتيىستى حالىقتىڭ 66،6%-ى نەمەسە جالپى حالىقتىڭ 40،2%-ى قامتىلدى»، — دەدى مارات شورانوۆ.