بىلتىر قازاقستاننىڭ داعدارىس ورتالىقتارىنا 4 مىڭنان استام ادام جۇگىنگەن.
اقپاراتقا سۇيەنسەك، ەڭ كوبى - استانادان، دەپ حابارلايدى Almaty-akshamy.kz
ق ر ادام قۇقىقتارى جونىندەگى ۋاكىل كەڭسەسى "وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى" ارنايى بايانداما جاسادى. اقپاراتقا سۇيەنسەك، 2023 جىلى داعدارىس ورتالىقتارىنا 4 مىڭنان استام ادام جۇگىندى. ونىڭ ىشىندە 3 مىڭنان استامى مەديسينالىق كومەك الىپ، 1 مىڭعا جۋىعى جۇمىسقا ورنالاستىرىلىپ، قۇجاتتار الدى.
"2023 جىلى داعدارىس ورتالىقتارىنا كومەك سۇراعان ادامداردىڭ سانى 4386 قۇرادى. اتالعان كەزەڭدە كومەك سۇراعانداردىڭ كوبى استانادا – 510، الماتىدا – 410، شىمكەنتتە – 358 جانە قىزىلوردا وبلىسىندا – 331. ال، كورسەتكىش تومەن كورسەتكەن وڭىرلەر قاتارىندا شىعىس قازاقستان وبلىسى - 90، ماڭعىستاۋ وبلىسى – 60 جانە سولتۇستىك قازاقستان وبلىسىندا – 31 ادام"، - دەلىنگەن باياندامادا.
ادام قۇقىقتارى جونىندەگى ۋاكىل ارتۋر لاستايەۆ تۇرمىستىق زورلىق-زومبىلىق جاعدايلارىنىڭ سانىن جانە ارنايى الەۋمەتتىك قىزمەتتەردى العان ادامداردىڭ سانىن سالىستىرا وتىرىپ، قۇربانداردىڭ باسىم كوپشىلىگى قاجەتتى كومەك الا المايدى دەگەن قورىتىندىعا كەلەدى.
"تۇرمىستىق زورلىق – زومبىلىق قۇرباندارى كوبىنەسە قۇقىق قورعاۋ ورگاندارىنا جۇگىنبەيدى، دەمەك، زارداپ شەككەندەر رەتىندە انىقتالمايدى جانە ناتيجەسىندە ارنايى الەۋمەتتىك قىزمەتتەرگە قول جەتكىزە المايدى"، - دەدى ول.
وسى باعىتتاعى ءۇش نەگىزگى ماسەلە:
وقيعادان كەيىن زارداپ شەككەندەرمەن جۇمىس؛
داعدارىس ورتالىقتارى جەلىسىنىڭ كەيبىر ايماقتارىنداعى دامىماۋى؛
زورلىق-زومبىلىق قۇرباندارىنىڭ كوپشىلىگى ءۇشىن ورتالىقتاردىڭ قول جەتىمسىزدىگى.
باياندامادا تۇرمىستىق زورلىق-زومبىلىق قۇرباندارى تۋرالى عانا ەمەس، قۇقىق بۇزۋشىلاردى قايتا الەۋمەتتەندىرۋ تۋرالى دا ايتىلادى
"قازىرگى ۋاقىتتا داعدارىس ورتالىقتارى تەك تۇرمىستىق زورلىق-زومبىلىق قۇرباندارىنا قىزمەت كورسەتەدى. اگرەسسورلارمەن جۇمىس-ولارمەن پسيحوكوررەكسيالىق كۋرس وتكىزۋ-الى زاڭمەن شەشىلگەن جوق. ال بۇل ماسەلەمەن اينالىساتىن ۇكىمەتتىك ەمەس ۇيىمدار وسى باعىت بويىنشا قارجىلاندىرىلمايدى"، – دەلىنگەن باياندامادا.
ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتى بويىنشا، ەل بويىنشا تۇرمىستىق زورلىق-زومبىلىق قۇرباندارىنا ارناۋلى الەۋمەتتىك قىزمەتتەردى 46 داعدارىس ورتالىعى كورسەتەدى، ونىڭ 15 – ءى مەملەكەتتىك، 31 – ءى مەملەكەتتىك ەمەس. 2022 جىلى مۇنداي ورتالىقتاردىڭ سانى 42 بولعان.