ەلىمىزدىڭ كۇرە جولدارىنا جارىق شاعىلىستىرعىشتار ورناتىپ جاتىر

وسىنىڭ ارقاسىندا قارسى باعىتتا كەلە جاتقان كولىكتەردىڭ شامدارى جۇرگىزۋشىلەرگە كەدەرگى كەلتىرمەيدى.

رەسپۋبليكالىق ماڭىزى بار كۇرە جولداردا قوزعالىس قاۋىپسىزدىگىن ارتتىرۋ ءۇشىن ارنايى جارىقتى شاعىلىستىراتىن ەكراندار ورناتىلۋدا، دەپ حابارلايدى Almaty-akshamy.kz

جول قوزعالىسى قاۋىپسىزدىگىن ارتتىرۋ ءۇشىن جولشىلار رەسپۋبليكالىق ماڭىزى بار م-32 "سامارا-شىمكەنت" جانە ا-2 "الماتى-تاشكەنت-تەرمەز" اۆتوجولدارىنىڭ ءبىرقاتار ۋچاسكەسىندە، سونداي-اق كۇيىك جانە قورداي اسۋلارىندا 40 مىڭعا جۋىق ارنايى جارىقتى شاعىلىستىراتىن پلاستينالاردى ورناتتى. قاۋىپسىزدىكتى قامتاماسىز ەتەتىن ارنايى قوندىرعىلار تۇركىستان جانە جامبىل وبلىستارى اۋماعىندا ورناتىلدى.

قوندىرعىنىڭ باستى ارتىقشىلىعى — قاراما-قارسى باعىتتا كەلە جاتقان كولىكتەردىڭ شامدارى جۇرگىزۋشىلەرگە كەدەرگى كەلتىرمەيدى. بۇل، اسىرەسە، تۇنگى ۋاقىتتا ءقاۋىپسىز ءارى ىڭعايلى. قوندىرعى كوپجولاقتى جولدارعا عانا ورناتىلادى.

الداعى ۋاقىتتا ءدال وسىنداي ارنايى جارىقتى شاعىلىستىراتىن ەكراندار كولىك قارقىنى جوعارى “الماتى-قورعاس” جانە ر-7 “بۋراباي اۋماعى” كۇرە جولدارىندا پايدا بولادى.