قازاقستاننىڭ تۋى اقش-تىڭ نيۋ-يورك قالاسىندا سالتاناتتى تۇردە كوتەرىلدى.
امەريكانىڭ ەڭ ءىرى مەگاپوليسى رەسپۋبليكا كۇنىنە قازاقستاندىقتارعا وسىنداي تارتۋ جاسادى. قالا مەرى ەريك ادامس سالتاناتتى شارانى ءوزىنىڭ جەكە پاراقشاسىندا جاريالادى، دەپ حابارلايدى Almaty-akshamy.kz «حابار 24» ارناسىنىڭ سايتىنا سىلتەمە جاساپ.
ول قازاق ەلىنىڭ كوك بايراعىن كوتەرۋ ارقىلى نيۋ-يوركتىڭ قۋاتى مەن رۋحىن كوتەرەتىنىن ايتتى.
«ءبىزدىڭ قالامىزدى جاقسى كورىپ، قۇرمەتتەيتىن ازاماتتاردىڭ ءبىرى – قازاقستاندىقتار. ءبىزدىڭ قالامىزداعى وتە بەلسەندى قاۋىمداستىق. بيزنەس اشىپ، ىنتىماقتاستىق نىعايتىپ جاتىرسىزدار. وسىنداعى باس كونسۋلمەن دە كوپ جىلدان بەرى جاقسى دوسپىز. سىزدەر ءبىلىمنىڭ قۋاتىن تۇسىنگەن ەلسىزدەر. وسىندا سىزدەردىڭ تۋلارىڭىزدى كوتەرۋ ارقىلى ءبىز نيۋ-يورك قالاسىنىڭ قۋاتى مەن رۋحىن كوتەرەمىز. سىزدەرگە ءبىزدىڭ قالانىڭ الۋان ءتۇرلى مادەنيەتىن كوتەرۋگە ۇلەس قوسقاندارىڭىز ءۇشىن راحمەت!» - دەدى نيۋ-يورك قالاسىنىڭ مەرى ەريك ادامس.