ەلىمىزدىڭ حوككەيشىلەرى مينيستردەن ماراپات الدى

نۇر-سۇلتاندا ءداستۇرلى تۇردە جازدا ق ر چەمپيوناتىنىڭ باستالۋى قارساڭىندا وتەتىن حوككەيدەن قازاقستان كۋبوگىنىڭ كەزەكتى ويىنى اياقتالدى.

بۇل جولى بەدەلدى ولجا ءۇشىن ەلىمىزدىڭ وڭىرىنەن جينالعان 11 كلۋب، سونداي-اق وزبەكستاننان كەلگەن «حۋمو» كومانداسى سايىسقا ءتۇستى. توپتىق كەزەڭنىڭ جانە جارتىلاي فينالدىڭ قورىتىندىسى بويىنشا اقتىق سايىستا قاراعاندىدان كەلگەن، قازاقستاننىڭ قازىرگى چەمپيونى «سارىارقا» مەن Pro Hokei Ligasy ماۋسىمىنىڭ كۇمىس جۇلدەگەرى كوكشەتاۋلىق «ارلان» كەزدەستى، دەپ حابارلايدى Almaty-akshamy.kz.

تارتىستى كۇرەستە 3:0 ەسەبىمەن قاراعاندىلىقتار جەڭىسكە جەتتى. كۋبوكتىڭ ۇزدىك حوككەيشىلەرى قاقپاشى ماكسيم گريازنوۆ، قورعاۋشى يۆان ستەپانەنكو (ەكەۋى دە – «ارلان»)، شابۋىلشى اندرەي لاگۋنوۆ («سارىارقا») جانە جاس ويىنشى ۆسيەۆولود لوگۆين («نوماد») اتاندى.

«حوككەيشىلەردى، جاتتىقتىرۋشىلار شتابىن، «سارىارقا» حوككەي كلۋبىنىڭ باسشىلىعىن جانە جانكۇيەرلەرىن قازاقستان كۋبوگىنىڭ فينالىنداعى سەنىمدى جەڭىسىمەن قۇتتىقتايمىن. ءۇشىنشى جىل قاتارىنان قاراعاندىلىق كلۋب وسىناۋ كۋبوكتىڭ يەگەرى اتانىپ وتىر. بۇل جەڭىس شىن مانىندە كوماندانىڭ تۋرنير بويى كورسەتكەن جارقىن ويىنىنىڭ ءساتتى ناتيجەسى. فينالدىق ويىن - جانكۇيەرلەر مەن وسى سپورت ءتۇرىن ۇناتاتىندار ايرىقشا كۇتەتىن شەشۋشى  ءسات. كوماندالارعا شەكسىز ەموسيا سىيلاعانى ءۇشىن العىس ايتامىن»، - دەدى ق ر مادەنيەت جانە سپورت ءمينيسترى داۋرەن ابايەۆ.