شىمكەنت پەن پاۆلودار قالالارىنداعى تەمىرجول ۆوكزالدارىندا قايتا جاڭارتۋ جۇمىستارى اياقتالدى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
ماسەلەن، شىمكەنت تەمىرجول ۆوكزالىندا اۋقىمدى رەكونسترۋكسيا جۇمىستارى جۇرگىزىلدى. ۆوكزال وتكەن عاسىردىڭ 60-جىلدارىندا بوي كوتەرگەن. ستراتەگيالىق نىساندا 20 جىلدان استام ۋاقىت بويى كۇردەلى جوندەۋ جۇرگىزىلمەگەن. ۆوكزال تاۋلىك سايىن بىرنەشە مىڭ جولاۋشىنى قابىلداۋعا قاۋقارلى. قايتا قۇرۋ جۇمىستارىنان كەيىن عيمارات سىرتى تارتىمدى كەلبەتكە يە بولدى. ەندىگى كەزەكتە ۆوكزالدىڭ جالپى اۋدانى 2 249،33 شارشى مەترگە دەيىن ۇلعايدى جانە ۆوكزال تاۋلىگىنە 6 مىڭ ادامعا دەيىن قابىلداي الادى. كۇتۋ زالدارىنىڭ دا اۋدانى 1982،3 شارشى مەترگە دەيىن ۇلعايدى. بيلەت كاسسالارىنىڭ سانى التىدان سەگىزگە دەيىن ءوستى. نامازحانا جانە انا مەن بالا بولمەسى ءتيىستى جيھازبەن جابدىقتالعان.
پاۆلودار تەمىرجول ۆوكزالى دا بيىل تولىعىمەن جوندەلگەنىن اتاپ وتكەن ورىندى. ۆوكزال عيماراتى 40 جىلدان استام ۋاقىت بۇرىن سالىنعان. نىساندا بۇعان دەيىن كۇردەلى جوندەۋ جۇمىستارى 2004-2005 جىلدارى جۇرگىزىلگەن. جوندەۋ جۇمىستارىنىڭ ناتيجەسىندە جارىقتاندىرۋ، جەلدەتۋ، سۋ جانە جىلىتۋ جۇيەلەرى اۋىستىرىلعان. ۆوكزال ءبىرىڭعاي كۇتۋ ايماعىمەن جابدىقتالدى. ساقتاۋ كامەراسى مەن ءدارىحانا دا حالىققا قىزمەت كورسەتەدى. انا مەن بالاعا ارنالعان جەكە بولمە، ويىن الاڭى اشىلعان. مۇمكىندىگى شەكتەۋلى جاندار ءۇشىن ليفتىلەر مەن ارنايى كوتەرگىشتەر ورناتىلعان. جالپى كۇردەلى جوندەۋ جانە قايتا جاڭارتۋ جۇمىستارى زاماناۋي تالاپتاردى ەسكەرە وتىرىپ جۇرگىزىلگەن.