ەلىمىزدىڭ بەس وڭىرىندە ازىق-تۇلىك باعاسى شارىقتاپ تۇر

اكىمدىكتەر الەۋمەتتىك ماڭىزدى ازىق-تۇلىك باعاسىن ۇستاي الماي وتىر.

ساۋدا جانە ينتەگراسيا ءمينيسترى سەرىك جۇمانعارين ازىق-تۇلىك باعاسى شارىقتاپ تۇرعان وڭىرلەردى اتادى، دەپ حابارلايدى Almaty-akshamy.kz

قازاقستاندا جىل باسىنان بەرى ازىق-تۇلىك ينفلياسياسىنىڭ ورتاشا دەڭگەيى 1،4 پايىزدى قۇرادى. ءبىراق كەيبىر وڭىرلەردە بۇل كورسەتكىش الدەقايدا جوعارى بولىپ تۇر.

اتاپ ايتقاندا، استانا مەن شىمكەنت قالالارىندا 2،2%، قىزىلوردا مەن سولتۇستىك قازاقستان وبلىستارىندا 1،8%، اقتوبە وبلىسىندا 1،7%، ال ۇلىتاۋ وبلىسىندا ازىق-تۇلىك 1،5 پايىزعا قىمباتتادى.

اكىمدىكتەر الەۋمەتتىك ماڭىزدى ازىق-تۇلىك تاۋارلارى باعاسىن دا ۇستاي الماي وتىر. ماسەلەن، ماڭعىستاۋ وبلىسىندا وسى ساناتتاعى تاۋارلار 3،4 پايىزعا كوتەرىلدى. ۇلىتاۋ وبلىسىندا 2،8%-عا، ال استانا قالاسىندا 2،5%-عا وسكەن.

"تاۋارلار بولىنىسىندە جىل باسىنان بەرى ەڭ جوعارى ءوسىم پيازعا 22،5%، كۇرىش 5،2%، قىرىققابات 4،1%، ءسۇت جانە ءسابىز 3،1%، كارتوپ 3،0%، ماكارون 2،6%-دى قۇرادى"، - دەدى جۇمانعارين.

ءمينيستردىڭ ايتۋىنشا، اكىمدىكتەر قولدا بار شارالاردى دا، قارجىنى دا ءتيىمدى پايدالانىپ جاتقان جوق. ماسەلەن، ماڭعىستاۋ وبلىسىندا باعانى تۇراقتاندىرۋعا ارنالعان 3،6 ميلليارد تەڭگەنىڭ 2 ميلليارد تەڭگەسى يگەرىلمەي جاتىر.

ال استانا قالاسىندا "اينالىم سحەماسى" بويىنشا قارجىلاندىرۋعا بولىنگەن قارجىنىڭ كولەمى 14 ميلليارد تەڭگەنى قۇرايدى. سوعان قاراماستان، ەلوردا باعانىڭ ءوسۋى بويىنشا كوشباسشىلار ۇشتىگىنە كىرەدى.