ەلىمىزدىڭ باتىسىندا بەلگىسىز دەرتتەن مال قىرىلدى

باتىس قازاقستان وبلىسىنىڭ ءبورلى اۋدانىندا ءىرى قارا بەلگىسىز ىندەتتەن باۋداي ءتۇسىپ جاتىر، دەپ حابارلايدى Almaty-akshamy.kz.

شارۋالاردىڭ سوزىنشە كۇنى بۇگىن اۋداندا 100-گە جۋىق سيىر ولگەن. اۋەلى اۋرۋ مال اقساڭداپ، كەلەسى كۇنى ۇستىندە ىسىك پايدا بولىپ، قۇلايتىن كورىنەدى. مال يەلەرى سونىڭ الدىندا مالدىڭ قاراسانعا قارسى ەگىلگەنىن ايتادى، اۋرۋ سول ۆاكسيناسيادان پايدا بولدى ما دەگەن كۇدىكتەرىن جاسىرمايدى.

«ءبورلى اۋدانى بويىنشا قاراسانعا ۇقساس سيمپتتومدارمەن ءىرى قارا مالى ءولىپ جاتىر. ولاردىڭ بىردەن-بىر بەلگىلەرى اياعىندا، توسىندە، موينىندا ىسىكتەر پايدا بولادى، گۋبكا سەكىلىدى سۋ جينالا ما. سونىڭ سالدارىنان جەكە قوسالقى شارۋاشىلىقتاردا، شارۋا قوجالىقتارىندا ءىرى قارا مال قۇلاپ جاتىر. نەدەن ەكەنىن بىلمەي وتىرمىز. بارىنە قاراسانعا قارسى ۆاكسينا جاسالعان»، - دەيدى ءبورلى اۋداندىق فەرمەرلەر وداعىنىڭ ءتوراعاسى باقىت دالابايەۆ. 

وبلىستىق ۆەتەرينارلىق باسقارما ماماندارىنىڭ مالىمدەۋىنشە ءبورلى اۋدانىندا ولگەن مالدىڭ سانى 10. اۋەلى 7 باس ءولىپ، سونىڭ ۇشەۋىنەن سىناما الىنعان. قاراسان دا، ءسىبىر جاراسى دا دالەلدەنبەگەن. 30-ى كۇنى ولگەن 3 باس ءىرى قارانىڭ تالداما قورىتىندىسى ءالى شىقپاعان.

«ول 8-10 كۇن ىشىندە شىعادى. تاپ سول قاراسان سول اۋرۋدان بولىپ تۇر دەپ زەرتحانا قورىتىندىسىنسىز ايتا المايمىز. مال اۋىرىپ ءولدى دەگەن كۇدىك بولعان كەزدە ءدال قاي اۋرۋ دەپ مال دارىگەرى ۆەرديكت انا جەردە شىعارادى، سوعان تەكسەرەدى دە، سوسىن ءسىبىر جاراسى سەكىلدى ۇقساس اۋرۋلاردى دا قارايدى. ول تەك ءبىر اۋرۋعا تەكسەرمەيدى»، - دەدى بقو ۆەتەريناريا باسقارماسىنىڭ ءبولىم باسشىسى كەنجەبەك ايماشيەۆ.