ەلىمىزدىڭ باس ءمۇفتيى كاسىپكەرلەرگە ۇندەۋ جاسادى

كەشە قازاقستان مۇسىلماندارى ءدىني باسقارماسىندا رامازان ايىنا وراي ب ا ق وكىلدەرىنىڭ قاتىسۋىمەن وتكەن باسپا ءسوز ءماسليحاتى ءوتتى. 

وندا باس ءمۇفتي ناۋرىزباي قاجى تاعان ۇلى كاسىپكەرلەرگە ارنايى ۇندەۋ جاسادى، دەپ حابارلايدى Almaty-akshamy.kz.

«وسى رەتتە بارشا وتانداستارىمدى قاسيەتتى ايدا جۇزەگە اساتىن «رامازان قورجىنى»، «رامازان سىيى»، «رامازان ءتاتتىسى» «جومارت جۇما»، سىندى قايىرىمدىلىق ءىس-شارالارعا ۇلەس قوسۋعا شاقىرامىن. كاسىپكەرلەردى الەۋمەتتىك ماڭىزى بار ازىق-تۇلىكتەردىڭ باعاسىنا مۇمكىندىگىنشە جەڭىلدىك جاساۋعا ۇندەيمىن. رامازان ايىنا تۋرا كەلگەن قۇدايى استاردى اۋىزاشار ۋاقىتىندا وتكىزگەن ابزال ەكەنىن ايرىقشا اتاپ وتكىمىز كەلەدى.  

قوعامدىق تاماقتانۋ ورىندارىندا اۋىزاشار ءمازىرىن حالىققا ىڭعايلى باعامەن ۇسىنۋ دا – ساۋاپتى ءىستىڭ ءبىرى. دۇكەندەردە كۇللى جاماندىقتىڭ باستاۋى بولعان اراق-شاراپ ساتىلماسا دەگەن تىلەگىمىزدى جەتكىزەمىز. سونىمەن قاتار بارشا حالىقتىڭ ورتاق يگىلىگى ءۇشىن سالىنىپ جاتقان جول، كوپىر، مەكتەپ، مەشىت، مەدرەسە، بالاباقشا، سپورت كەشەنى سىندى ماڭىزدى عيماراتتارعا از دا بولسا ۇلەس قوسىپ، بەلسەندىلىك تانىتۋعا شاقىرامىن» دەدى قمدب ءتوراعاسى.