عاني بەيسەمبايەۆ اۋىل مەكتەپتەرىنىڭ ساپاسىن ارتتىرۋ بويىنىشا جۇرگىزىلىپ جاتقان جۇمىستاردىڭ ناتيجەسىمەن ءبولىستى.
اسىرەسە، اقتوبە وبلىسىندا جۇزەگە اسىرىلعان «تىرەك مەكتەبى – شاعىن جيناقتى مەكتەپ» مودەلى تيىمدىلىگىن كورسەتتى، دەپ حابارلايدى aqshamnews.kz وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
جوبا ناتيجەسى 2023 جىلمەن سالىستىرعاندا شاعىن جيناقتى اۋىل مەكتەپتەرىندەگى ءبىلىم ساپاسى ورتا ەسەپپەن 7 پايىزعا ارتقانىن كورسەتتى. وبلىستا سيفرلىق ءبىلىم بەرۋ ەكوجۇيەسى قالىپتاسىپ، ساپالى ينتەرنەتكە قول جەتكىزۋ ماسەلەلەرى شەشىلدى. وسىعان بايلانىستى وقۋ-اعارتۋ مينيسترلىگى ونى ەلىمىزدىڭ بارلىق وڭىرلەرىندە كەڭەيتۋدى ۇسىنىپ وتىر.
«جوبا اياسىندا اقتوبە وبلىسىندا جۇرگىزىلگەن كەشەندى جۇمىستار شاعىن جيناقتى مەكتەپتەردەگى ءبىلىم ساپاسىنىڭ ارتۋىنا ىقپال ەتتى. وقۋ-اعارتۋ مينيسترلىگى ۇلتتىق ۇيلەستىرۋشى رەتىندە اۋىل مەكتەپتەرىنىڭ دامۋ ستراتەگياسىن ازىرلەدى. ەندى اكىمدىكتەر ستراتەگيا نەگىزىندە جوبانى ماسشتابتاۋ جۇمىستارىن كەزەڭ كەزەڭىمەن ىسكە اسىرۋدى قامتاماسىز ەتۋى قاجەت»، - دەپ قورىتىندىلادى مينيستر.
ايتا كەتۋ كەرەك، بيىلعى جىلى جوباعا اقمولا، قوستاناي، پاۆلودار، باتىس قازاقستان جانە سولتۇستىك قازاقستان وبلىستارىنداعى 10 تىرەك جانە 30 شاعىن جيناقتى مەكتەپ تارتىلۋدا. 2025 جىلدىڭ قاڭتارىنان باستاپ جوباعا 17 ءوڭىردىڭ 192 تىرەك جانە 759 شاعىن جيناقتى مەكتەبى قاتىسادى. ال ءۇشىنشى كەزەڭدە وسى جوباعا قالعان شاعىن جيناقتى مەكتەپتەردىڭ بارلىعى تولىعىمەن قامتىلۋى ءتيىس.