ەلىمىزدىڭ اۋە كەڭىستىگىندە ەكى حالىقارالىق جولاۋشىلار ۇشاعى سوقتىعىسىپ قالا جازدادى. بۇل ۋاقىتتا ەكى رەيس شىمكەنت ايماقتىق ديسپەچەرلىك ورتالىعىنىڭ ايماعىندا بولعان. وقىس وقيعاعا قاتىستى كولىك مينيسترلىگى تەرگەۋ جۇرگىزۋدى قولعا الدى، دەپ حابارلايدى Aqshamnews.kz ءتىلشىسى Elordainfo.kz-كە سىلتەمە جاساپ.
كولىك مينيسترلىگىنىڭ باسپا ءسوز قىزمەتى اتالعان جاعدايدى بىلاي ءتۇسىندىردى:
«10 قاڭتار كۇنى استانا ۋاقىتى بويىنشا شامامەن ساعات 05:42-دە شىمكەنت ايماقتىق ديسپەچەرلىك ورتالىعى ايماعىندا «پوبەدا» اۋە كومپانياسىنىڭ ۆنۋكوۆو-سامارقاند باعىتى بويىنشا ۇشقان PBD997 رەيسىنە جانە «Uzbekistan Airways» اۋە كومپانياسىنىڭ تەرمەز-ماسكەۋ باعىتى بويىنشا ۇشقان UZB9609 رەيسىنە قىزمەت كورسەتۋ كەزىندە اۆياسيالىق وقىس جاعداي بولدى»، - دەپ جازىلعان حابارلامادا.
مينيسترلىك اۆياسيالىق وقيعانىڭ سەبەپتەرىن انىقتاۋ ءۇشىن ارنايى كوميسسيا قۇرىپ جاتىر.
ۆەدومستۆو تاراتقان مالىمەتكە سۇيەنسەك، ەگەر قوسىمشا ساراپتامالارعا قاجەتتىلىك تۋىنداماسا تەرگەۋ 3 ايدا اياقتالۋعا ءتيىس.