جەتى ايماقتا بالا قۇقىقتارى جونىندەگى ۋاكىل تاعايىندالدى.
ەل وڭىرلەرىندە بالا قۇقىقتارى جونىندەگى ۋاكىل لاۋازىمى ەنگىزىلىپ جاتىر. ەندى ءار ايماقتىڭ ءوز وكىلى بولادى، ولاردان بالالار دا، اتا-انالار دا كومەك سۇراي الادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وقۋ-اعارتۋ مينيسترلىگىنىڭ مالىمەتىنشە، بالا قۇقىقتارى جونىندەگى ۋاكىلدەر بالانىڭ قۇقىقتارى مەن زاڭدى مۇددەلەرىنىڭ بۇزىلۋى تۋرالى وتىنىشتەردى، جەرگىلىكتى اتقارۋشى ورگانداردىڭ جانە وزگە دە ۇيىمداردىڭ ارەكەتتەرىنە نەمەسە بەيارەكەتىنە قاتىستى شاعىمداردى قارايدى. سونداي-اق ولار بالالاردى قورعاۋ سالاسىنداعى ماسەلەلەردى شەشۋگە ارنالعان زاڭ جوبالارىن دامىتۋعا، ىلگەرىلەتۋگە قاتىسادى.
سونىمەن قاتار بالا قۇقىقتارى جونىندەگى ومبۋدسمەندەردىڭ مەملەكەتتىك ورگاندار مەن ءبىلىم بەرۋ، دەنساۋلىق ساقتاۋ، مادەنيەت، سپورت جانە حالىقتى الەۋمەتتىك قورعاۋ ۇيىمدارىنا كەدەرگىسىز قول جەتكىزۋى قامتاماسىز ەتىلەدى. بالا قۇقىقتارى جونىندەگى ۋاكىلدەر قوعامدىق نەگىزدە جۇمىس ىستەيتىنىن ايتا كەتەيىك.
«ۇكىمەتتىڭ قاۋلىسىنا سايكەس، ءقازىر بۇل لاۋازىم بارلىق وبلىس پەن رەسپۋبليكالىق ماڭىزى بار قالادا ەنگىزىلىپ جاتىر. بالالاردىڭ قۇقىقتارىن قورعاۋ جونىندەگى وبلىستىق ۋاكىلدەردى وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرى تاعايىندايدى. بالا قۇقىقتارى جونىندەگى وڭىرلىك ۋاكىلدەردى ىرىكتەۋدىڭ نەگىزگى كريتەرييلەرى - ۇمىتكەردىڭ بالالارمەن جۇمىس ىستەۋ تاجىريبەسى، ۇكىمەتتىك ەمەس ۇيىمدارداعى تاجىريبەسى نەمەسە قوعامدىق قىزمەتى، سونداي-اق تاعايىنداۋ كەزىندە بالالاردىڭ قۇقىقتارىن قورعاۋدا ۇمىتكەردىڭ قانداي ۇلەس قوسقانى ەسكەرىلەدى. بۇل بالالاردىڭ قۇقىقتارىن قورعاۋ سالاسىندا تاجىريبەسى جانە ءوز ۇستانىمى بار ەل قۇرمەتتەيتىن ادامدار بولۋى ءتيىس»، - دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى ەلينا پاۋلي.
ءقازىردىڭ وزىندە جەتى وبلىستا بالا قۇقىقتارى جونىندەگى ۋاكىلدەر تاعايىندالىپ ۇلگەردى. ولاردىڭ اراسىندا ۇكىمەتتىك ەمەس ۇيىمداردىڭ، قوعامدىق بىرلەستىكتەردىڭ جەتەكشىلەرى مەن زاڭگەرلەر بار.