بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى.
ءمينيستردىڭ مالىمدەۋىنشە، الەۋمەتتىك قىزمەت كورسەتۋ جۇيەسىن ترانسفورماسيالاۋ اياسىندا الەۋمەتتىك قىزمەتكەرلەر ينستيتۋتى كۇشەيتىلەدى، دەپ حابارلايدى Almaty-akshamy.kz
«الەۋمەتتىك جۇمىسقا بىلىكتىلىكتى تاۋەلسىز باعالاۋدان وتكەن سەرتيفيكاتتالعان ماماندار عانا جىبەرىلەدى. مۇگەدەكتىگى بار ازاماتتارعا قىزمەت كورسەتەتىن مامانداردى تاڭداۋ ءۇشىن الەۋمەتتىك قىزمەتكەرلەردىڭ ءتىزىمى جاسالادى. وندا ولاردىڭ بىلىكتىلىگى، كورسەتىلەتىن قىزمەتتەردىڭ تۇرلەرى مەن ساپاسى، جۇمىس ناتيجەلەرى تۋرالى اقپارات قامتىلادى»، - دەدى دۇيسەنوۆا.
ول الەۋمەتتىك قىزمەتكەرلەر ءۇشىن قىزمەتتەردىڭ بىلىكتىلىك دەڭگەيىن، ساناتى مەن ەرەكشەلىگىن ەسكەرەتىن ەڭبەكاقى تولەۋدىڭ جاڭا جۇيەسى ەنگىزىلەتىنىن اتاپ ءوتتى.
بۇدان بولەك، جەرگىلىكتى اتقارۋشى ورگاندار جانىنان قۇرىلعان الەۋمەتتىك قىزمەتتەر پورتالى بويىنشا كوميسسيالارعا جاڭا وكىلەتتىكتەر بەرۋ كوزدەلىپ وتىر. ولار:
ساپاسىز تاۋار نەمەسە قىزمەت تۋرالى مۇگەدەكتىگى بار ادامداردىڭ ءوتىنىشىن 5 كۇن ىشىندە قابىلداۋ جانە قاراۋ؛
مەرزىمىن كورسەتە وتىرىپ، ۇسىنىلعان تاۋاردى نەمەسە كورسەتىلگەن قىزمەتتى تۇزەتۋ تۋرالى حاتتى جەتكىزۋشىگە جىبەرۋ جانە ولاردىڭ ورىندالۋىن باقىلاۋ؛
جەتكىزۋشىنى الەۋمەتتىك قىزمەتتەر پورتالىنان الىپ تاستاۋ جانە جاۋاپسىز جەتكىزۋشىلەر تىزىمىنە ەنگىزۋ.