بىلتىر 48 007 ملرد تەڭگەگە ونەركاسىپ ءونىمى ءوندىرىلدى.
ونىڭ ىشىندە تاۋ-كەن ءوندىرۋ ونەركاسىبى سالاسىنا 24 644 ملرد تەڭگە، وڭدەۋ ونەركاسىبىنە 20 697 ملرد تەڭگە تيەسىلى، دەپ حابارلايدى Almaty-akshamy.kz ۇلتتىق ستاتيستيكا بيۋروسىنا سىلتەمە جاساپ.
تاۋ-كەن ءوندىرۋ ونەركاسىبى مەن كارەرلەردى قازۋدا ونەركاسىپ ءوندىرىسىنىڭ يندەكسى 99%-دى قۇرادى. وعان شيكى مۇناي (98،1%)، تابيعي گاز (99%) بەن تەمىر كەنى (79،4%) سالالارىندا ءوندىرۋ كورسەتكىشىنىڭ ازايۋى سەبەپ.
«وڭدەۋ ونەركاسىبىندە ءوندىرىس 3،4%-عا ارتتى. سۋسىندار (111،2%)، تەمەكى ونىمدەرى (107،9%)، مۇناي وڭدەۋ ونىمدەرى (101،8%)، حيميا ونەركاسىبىنىڭ ونىمدەرى (110،2%)، رەزەڭكە جانە پلاستماسسا بۇيىمدارى (102،1%)، نەگىزگى اسىل جانە ءتۇستى مەتالدار (105،5%)، اۆتوكولىك قۇرالدارىنىڭ (119،1%) ءوندىرىسى ۇلعايدى»، - دەلىنگەن ۇلتتىق ستاتيستيكا بيۋروسى تاراتقان اقپاراتتا.
رەسپۋبليكانىڭ 13 وڭىرىندە ءوندىرىس كولەمىنىڭ ارتۋى تىركەلدى. ايتارلىقتاي ءوسىم اقمولا، جامبىل، اباي وبلىستارىندا جانە الماتى قالاسىندا بايقالدى. ال، تۇركىستان، قوستاناي، اتىراۋ، قىزىلوردا، باتىس قازاقستان جانە پاۆلودار وبلىستارىندا ءوندىرىس كولەمى تومەندەدى.