قازاقستانداعى سانيتارلىق-ەپيدەميولوگيالىق جاعداي جاقسارىپ كەلەدى.
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتاريالىق-ەپيدەميولوگيالىق جاعداي قارالدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساي وتىرىپ.
دەنساۋلىق ساقتاۋ ءمينيسترى الەكسەي سوي حالىقتى ۆاكسينالاۋ بارىسى مەن قازىرگى جاعداي تۋرالى باياندادى.
ەلىمىز COVID-19 تارالۋ قارقىنى بويىنشا «جاسىل» ايماقتا ورنالاسقان. ۆيرۋستىڭ رەپرودۋكتيۆتىك يندەكسى 0،9، ينفەكسيالىق توسەك-ورىن جۇكتەمەسى 23%-دى، رەانيماسيالىق توسەك-ورىن جۇكتەمەسى 21%-دى قۇرايدى.
«قىزىل ايماقتا» نۇر-سۇلتان قالاسى، «سارى ايماقتا» اتىراۋ، باتىس قازاقستان جانە قاراعاندى وبلىستارى ورنالاسقان. قالعان 13 ءوڭىر – «جاسىل ايماقتا». بۇگىنگى تاڭدا 2،5 ملن-نان استام ادام ءبىرىنشى كومپونەنتتى، 1،4 ملن-نان استام ادام ەكىنشى كومپونەنتتى الدى.
ۇكىمەت باسشىسى دەنساۋلىق ساقتاۋ مينيسترلىگى مەن اكىمدىكتەرگە سانيتارلىق-ەپيدەميولوگيالىق جاعدايدى باقىلاۋدا ۇستاۋدى، نۇر-سۇلتان قالاسىنىڭ اكىمدىگىنە سانيتارلىق-ەپيدەميولوگيالىق شارالاردى ساقتاۋعا جانە حالىقتى ۆاكسينالاۋعا ەرەكشە نازار اۋدارۋدى تاپسىردى.
«ماسكا تاعۋ رەجيمى، اسىرەسە، عيمارات ىشىندە ساقتالادى. مونيتورينگتىك توپتار جۇمىستى جانداندىرسىن. ايماقتاعى كورشىلەرىمىزدە اۋرۋدىڭ ءوسۋى بايقالادى، سوندىقتان قوسىمشا الدىن الۋ شارالارىن قابىلداۋ قاجەت. ەڭ الدىمەن، ۆاكسينامەن قامتۋدى كەڭەيتۋ كەرەك. ۆاكسينالاۋدىڭ كۇندەلىكتى كولەمىن ارتتىرعان ءجون»، — دەدى اسقار مامين.
پرەمەر-مينيستر Ashyq قوسىمشاسىن ودان ءارى ەنگىزۋدى، ءاقپاراتتىق-تۇسىندىرۋ جۇمىستارىن كۇشەيتۋدى جانە حالىقتى ۆاكسينالاۋعا ىنتالاندىرۋدىڭ پارمەندى تەتىكتەرىن ازىرلەۋدى تاپسىردى.