قازاقستاندا 1،5 مىڭعا جۋىق دارىلىك وسىمدىك وسەدى.
بۇل تۋرالى ق ر ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى ەرلان قۇتپانبايەۆ ورتالىق كوممۋنيكاسيالار قىزمەتىندە وتكەن بريفينگتە ايتتى، دەپ حابارلايدى Almaty-akshamy.kz.
«قازاقستاننىڭ وسىمدىكتەر دۇنيەسى اعاش-بۇتا جانە ءشوپ وسىمدىكتەرىنىڭ 6 مىڭنان استام ءتۇرىن قۇرايدى. ونىڭ ىشىندە 1،5 مىڭعا جۋىق ءتۇرى دارىلىك وسىمدىكتەر (ونىڭ ىشىندە 230 ءتۇرى رەسمي مەديسينادا تانىلعان)، 390 ءتۇرى قازاقستان رەسپۋبليكاسىنىڭ قىزىل كىتابىنا ەنگىزىلگەن، 110 ءتۇرى رەليكتى وسىمدىكتەر، سونداي-اق 700 ەندەميكالىق وسىمدىك تۇرلەرى»، - دەدى ول.
قۇتپانبايەۆتىڭ ايتۋىنشا، قازاقستاندا ەكسپورتتالاتىن دارىلىك وسىمدىكتەرىنىڭ تىزىمىنە 14 ءتۇرى كىرەدى – بۇل ميا، فەرۋلا، سيستانحە، تۇركىستان سابىن تامىرى جانە باسقالارى.
«كەدەندىك ستاتيستيكا دەرەكتەرى بويىنشا قازاقستاندىق ميا تامىرىن وتكىزۋدىڭ نەگىزگى نارىقتارى جۇڭگو، تۇركيا جانە اقش بولىپ تابىلادى. مىسالى، قىتايعا 2018 جىلدان باستاپ 2022 جىلعا دەيىن 40 مىڭ توننا ميا تامىرى ەكسپورتتالدى. قاراۋسىز قولدانىلۋىنا بايلانىستى دارىلىك وسىمدىكتەردىڭ شيكىزات قورى تاۋسىلادى. دارىلىك وسىمدىكتەردى باقىلاۋسىز جيناۋ كولەمىنىڭ وسۋىنە سىرتقى نارىقتارداعى سۇرانىستىڭ ارتۋى ىقپال ەتەدى»، - دەدى ەرلان قۇتپانبايەۆ.