حالىقارالىق ستاندارتتاۋ ۇيىمىنىڭ ISO 3166-2 ستاندارتىنا سايكەس «KAZ» جانە «KZ» گەوكودتارى رەسمي تۇردە قازاقستان رەسپۋبليكاسىن بەلگىلەيدى.
بۇل كودتار ينتەرنەت دومەندەرىندە، مەملەكەتتىك قۇجاتتاردا، ەسەپ بەرۋ قۇجاتتارىندا جانە نومىرلەردە كەڭىنەن قولدانىلادى. ولار ەل ىشىندە دە، شەتەلدە دە تانىمال. وسىعان بايلانىستى قازاقستاندا حالىقارالىق جانە رەسپۋبليكالىق ماڭىزى بار اۆتوموبيل جولدارى ءۇشىن «KAZ» جانە «KZ» يندەكستەرى بەكىتىلدى، دەپ حابارلايدى aqshamnews.kz.
«KAZ» يندەكسى بىرنەشە ءوڭىر ارقىلى وتەتىن 23 اۆتوموبيل جولىنا بەرىلگەن. ماسەلەن، استانا مەن الماتىنى جالعاپ، قاراعاندى ارقىلى وتەتىن جول KAZ01 يندەكسىن ەنشىلەسە، «استانا – كوكشەتاۋ (اينالما جولمەن) – پەتروپاۆل – رف شەكاراسى («جاڭا جول» وتكىزۋ پۋنكتى)» باعىتى KAZ02 بولىپ بەلگىلەندى.
«KZ» يندەكسى ءبىر ءوڭىردىڭ شەگىندە ورنالاسقان رەسپۋبليكالىق ماڭىزى بار 88 جول ءۇشىن قولدانىلادى. ماسەلەن، اقتوبە وبلىسىنداعى «قاندىاعاش – ەمبى – شالقار – ىرعىز» تاسجولى KZ04-02 يندەكسىن الدى. وندا كورسەتىلگەن «04» ءنومىرى – ءوڭىردى، ال «02» ءنومىرى – وبلىس شەگىندەگى جولدىڭ رەتتىك ءنومىرىن كورسەتەدى. جامبىل وبلىسىنداعى «مەركى – شۋ – بۋرىلبايتال» اۆتوموبيل جولى KZ08-04 دەپ بەلگىلەندى، مۇنداعى «08» – ءوڭىردى، ال «04» — وبلىس شەگىندەگى جولدىڭ ءنومىرىن بىلدىرەدى.
«E» جانە «ان» سياقتى حالىقارالىق كەلىسىمدەر ارقىلى تاعايىندالعان اۆتوموبيل جولدارىنىڭ يندەكستەرى وزگەرىسسىز قالاتىن بولادى. بۇل حالىقارالىق كولىك جۇيەسىندەگى جۇيەلىلىك پەن ترانزيتتىك قوزعالىس جايلىلىعىن قامتاماسىز ەتەدى.
اۆتوموبيل جولدارىنىڭ ءتىزىمى، اتاۋلارى جانە يندەكستەرىمەن مىنا سىلتەمە بويىنشا تانىسۋعا بولادى: https://adilet.zan.kz/rus/docs/V1500011402.جاڭا يندەكستەۋ جۇيەسىن ازىرلەۋدى «قازاقستان جول عىلىمي-زەرتتەۋ ينستيتۋتى» اق جۇزەگە اسىردى.جاڭا يندەكستەردى ەسكەرە وتىرىپ، جول بەلگىلەرىن جاڭارتۋ جوسپارلى جۇمىستاردىڭ ورىندالۋىنا جانە توزعان ەلەمەنتتەردىڭ اۋىستىرىلۋىنا قاراي بىرتىندەپ اتقارىلادى. بۇل ءۇشىن قوسىمشا قاراجات تالاپ ەتىلمەيدى، جۇمىستار جولداردى كۇتىپ ۇستاۋ شەڭبەرىندە جۇرگىزىلەدى.
