قازاق ەلىندەگى وزبەك كينوسىنىڭ كۇندەرى اياقتالدى
بۇگىن نۇر-سۇلتان قالاسىنداعى ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا قازاقستانداعى وزبەك كينوسى كۇندەرىنىڭ جابىلۋ سالتاناتى ءوتتى، دەپ حابارلايدى Almaty-akshamy.kz
ءىس-شارا بارىسىندا ءۇش كۇن بويى قازاقستاندىق كورەرمەندەر نازارىنا وزبەكستان كينوسىنىڭ زاماناۋي تۋىندىلارى ۇسىنىلدى. سونىمەن قاتار وزبەك فيلمدەرى كينوتەاترلاردا عانا ەمەس، رەسپۋبليكالىق تەلەارنالاردا دا كورسەتىلدى.
وزبەك كينوسى كۇندەرى اياسىندا قازاقستان مەن وزبەكستان اراسىندا كينەماتوگرافيا سالاسى بويىنشا قارىم-قاتىناس پەن تاجىريبە الماسۋ ماقساتىنداعى ەكىجاقتى مەموراندۋمعا قول قويىلدى. سونداي-اق ەكى جاقتى بىرلەسكەن كينوجوبالار جوسپارلاندى.
«وزبەككينو» اگەنتتىگى تاپسىرىسى بويىنشا تاسپالانعان رەجيسسەر حيلول ناسيموۆتىڭ «مەروس» كوركەم ءفيلمى، ش. ماحمۋدوۆتىڭ «اباي» دەرەكتى ءفيلمى، جاحونگير قاسىموۆتىڭ «يبرات» سىندى ءبىرقاتار كوركەم فيلمدەرى كورسەتىلدى.
وزبەك كينوسى كۇندەرىنىڭ جابىلۋ سالتاناتىنا وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى سايديكرام نيازحودجايەۆ قاتىسىپ، ەكى ەلدىڭ كينەماتوگرافيستەرىنە ىنتىماقتاستىق پەن الداعى جۇمىستارىنا ساتتىلىك تىلەدى.