قازاقستان بويىنشا اتاۋلى جالاقىنىڭ ورتاشا ءمانى بيىلعى IءىI توقساندا 299 782 تەڭگەنى قۇرادى. بۇل تۋرالى ۇلتتىق ستاتيستيكا بيۋروسى ءمالىم ەتتى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.

2021 جىلدىڭ ءتيىستى توقسانىنا قاراعاندا ءوسىم - 23%، ناقتى ماندە – 5،8% قۇرادى.

جالاقىنىڭ مەديانالىق ءمانى (جالاقى قاتارىنىڭ ورتالىق دەڭگەيى) 2022 جىلعى ءىIءى توقساندا باعالاۋ بويىنشا 189 018 تەڭگەنى قۇرادى.

ەڭبەك ستاتيستيكاسى جانە ءومىر ءسۇرۋ دەڭگەيى دەپارتامەنتىنىڭ ديرەكتورى ناتاليا بەلونوسوۆا تۇسىندىرگەندەي، الدىڭعى توقسانمەن سالىستىرعاندا ءىىى توقسانداعى جالاقى دەڭگەيى ادەتتە تومەندەپ وتىرادى.

بۇل ءۇردىس جىل سايىن بايقالادى جانە ەكىنشى توقسان ۋاقىتىنا ءدوپ تۇسەتىن ماۋسىمدىق (دەمالىس تولەمدەرى، ماۋسىمدىق جۇمىستار) جايتتارعا بايلانىستى.

"ەكىنشى توقسانمەن سالىستىرعاندا جالاقى دەڭگەيى 3،9 پايىزدىق تارماققا تومەندەدى (2021 جىلعى ءىىى توقسانداعى تومەندەۋ – 3،1 پايىزدىق تارماق). مۇنداي وزگەرىستەر جىل سايىن بايقالادى. جالاقىنىڭ ورتاشا ءمانىن ەسەپتەۋ كەزىندە تابىس سالىعى، زەينەتاقى جانە باسقا دا الەۋمەتتىك اۋدارىمدار سياقتى تولەمدەردىڭ بارلىق ءتۇرى ەسكەرىلەتىنىن اتاپ وتكىم كەلەدى"، – دەيدى ناتاليا بەلونوسوۆا.

جالاقىنىڭ ءوسۋى قىزمەتتىڭ بارلىق نەگىزگى ەكونوميكالىق تۇرلەرى بويىنشا بايقالدى.

2021 جىلعى ءتيىستى توقسانمەن سالىستىرعاندا ەڭ جوعارى ءوسىم – قۇرىلىس – 34،5%، اۋىل، ورمان جانە بالىق شارۋاشىلىعى – 31،3%، كولىك جانە قويمالاۋ – 31،1% سالالارىندا بايقالادى.

ال تومەندەۋ كورسەتىلەتىن قىزمەتتەردىڭ وزگە دە تۇرلەرىن ۇسىنۋدا – 5،5%-عا جانە دەنساۋلىق ساقتاۋ مەن حالىققا الەۋمەتتىك قىزمەت كورسەتۋ سالالارىندا – 8،9%-عا بايقالدى.

وڭىرلىك بولىنىستە ەڭ جوعارى ءوسىم ۇلىتاۋ وبلىسىندا – 39%. ەڭ تومەن ءوسىم استانا قالاسىندا بايقالدى – 15،1%.