ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە
ەڭبەك جانە حالىقتى الەۋمەتتىك قورعاۋ مينيسترلىگىنىڭ ەڭبەك جانە الەۋمەتتىك قورعاۋ كوميتەتىنىڭ مالىمەتى بويىنشا 2022 جىلدىڭ قورىتىندىسى بويىنشا وندىرىستەگى جازاتايىم وقيعالاردان 1465 جۇمىسكەر زارداپ شەكتى، ونىڭ 203ء-ى قازا تاپتى، دەپ حابارلايدى Almaty-akshamy.kz.
ەڭبەك جانە الەۋمەتتىك قورعاۋ مينيسترلىگىنىڭ مالىمدەۋىنشە، بۇل رەتتە 2022 جىلدىڭ قورىتىندىسى بويىنشا وندىرىستىك جاراقات 2021 جىلدىڭ دەڭگەيىندە ساقتالدى.
2022 جىلى وندىرىستىك جاراقاتتانۋ كوەففيسيەنتى (1000 جۇمىسكەرگە شاققانداعى جازاتايىم وقيعالاردىڭ جيىلىگى) 0،22 قۇرادى.
رەسپۋبليكانىڭ وندىرىستىك ايماقتارىندا جاراقات الۋدىڭ ەڭ جوعارى دەڭگەيى ساقتالۋدا. ماسەلەن، قاراعاندى وبلىسىندا - 180 ادام، شقو-دا – 169 ادام، قوستاناي وبلىسىندا – 142 ادام، پاۆلودار وبلىسىندا – 112 ادام، اقتوبە وبلىسىندا – 103 ادام، الماتى قالاسىەد. – 114 ادام زارداپ شەكتى.
ەكونوميكانىڭ سالالارى بويىنشا ەڭ كوپ زارداپ شەككەندەر تاۋ-كەن مەتاللۋرگيا كەشەنىنىڭ ونەركاسىپتەرىندە – 16،2 % جانە قۇرىلىس سالاسىندا – 15 %.
جازاتايىم وقيعالاردىڭ ورىن الۋىنىڭ نەگىزگى سەبەپتەرى: جابىرلەنۋشىنىڭ ءوزىنىڭ ورەسكەل ابايسىزدىعى (33،9%)؛ وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى (29%)؛ جول قوزعالىسى ەرەجەلەرىن بۇزۋ (9،4%)؛ قاۋىپسىزدىك جانە ەڭبەكتى قورعاۋ ەرەجەلەرىن بۇزۋ.
ءقاۋىپسىز ەڭبەك جاعدايىن جاساۋ مەن وندىرىستىك جاراقاتتانۋدى ازايتۋ ق ر ۇكىمەتى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ (بۇدان ارى-مينيسترلىك) نەگىزگى مىندەتتەرىنىڭ ءبىرى بولىپ تابىلادى.
سوڭعى بەس جىلدىڭ ىشىندە مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋ سالاسى بويىنشا قابىلدانعان كەشەندى شارالاردىڭ ناتيجەسىندە وندىرىستىك جاراقاتتانۋ دەڭگەيى 6،5%-عا ءتۇستى.
پروفيلاكتيكا مەن بۇزۋشىلىقتى الدىن الۋ ماقساتىندا ەلىمىزدىڭ 2800 كاسىپورنى قاۋىپسىزدىك پەن ەڭبەكتى قورعاۋ ستاندارتتارىن ەنگىزدى.
سونداي-اق، قازاقستان رەسپۋبليكاسىنىڭ كاسىپوداقتار فەدەراسياسىمەن بىرلەسىپ، مۇگەدەكتىگى بار ادامداردى «حالىقتىق باقىلاۋشى» رەتىندە تارتۋدى كوزدەيتىن «حالىقتىق باقىلاۋ» الەۋمەتتىك ماڭىزدى جوباسى ەنگىزىلۋدە. بۇگىنگى كۇنى جوبانى جۇزەگە اسىرۋعا رەسپۋبليكانىڭ 240 كاسىپورنى قوسىلىپ، وندا 600-دەن استام جۇمىسكەر ىشكى باقىلاۋدى جۇزەگە اسىرۋدا.
2019 جىلدان باستاپ مينيسترلىك تاراپىنان «نولدىك جاراقات - Vision Zero» تۇجىرىمداماسىن جەتىلدىرۋ بوليىنشا بەلسەندى جۇمىس اتقارىلۋدا. وعان بۇگىندە 332 كاسىپورىن قوسىلدى.
سونىمەن قاتار، «ونلاين ەڭبەك كونسۋلتانتى» ەلەكتروندى سەرۆيسى ىسكە قوسىلدى. ول جۇمىسكەر مەن جۇمىس بەرۋشىنىڭ اراسىندا قاشىقتىقتان ءوزارا ارەكەتتەسۋدى قامتاماسىز ەتۋ ءۇشىن ەڭبەك زاڭناماسىنىڭ ساقتالۋىنىڭ تيىمدىلىگىن ارتتىرۋعا مۇمكىندىك بەرەدى. سەرۆيس جۇمىس بەرۋشىنىڭ ەڭبەكتى قورعاۋ تالاپتارىنىڭ ساقتالۋىن وزىندىك تەكسەرۋدەن ءوتۋىن قاراستىرادى. سەرۆيس ىسكە قوسىلعالى بەرى 13 854 جۇمىس بەرۋشى ونى پايدالاندى.