مادەنيەت جانە اقپارات مينيسترلىگى تۇرعىنداردان كەلىپ تۇسكەن شاعىمدار نەگىزىندە LGBTQ+ سايتىن تەكسەرىپ، مونيتورينگ بارىسىندا بالالاردىڭ دەنساۋلىعى مەن دامۋىنا زيان كەلتىرەتىن اقپاراتتى ورنالاستىرۋعا قاتىستى زاڭ بۇزۋشىلىقتاردى انىقتادى، دەپ جازادى اlmaty-akshamy.kz KazFace.kz-كە سىلتەمە جاساپ.
ءداستۇرلى ەمەس سەكسۋالدىق باعىتتى ناسيحاتتايتىن ۆەب-سايتقا قاتىستى تۇرعىندار نارازىلىق ءبىلدىرىپ، پەتيسيا باستاعان ەدى. قوعامدىق پىكىردى ەسكەرگەن قۇزىرلى ورگان اقپارات كوزىن تەكسەرىپ، وعان تىيىم سالۋ سەبەبىن ءتۇسىندىردى.
بالالاردىڭ قۇقىقتارىن قورعاۋ جونىندەگى ۋاكىلەتتى ورگان ولاردىڭ پسيحو-جاستىق ەرەكشەلىكتەرىن، تەرىس اسەرىن ەسكەرىپ، ەل تۇرعىندارى اراسىندا لگبت قوزعالىسىنىڭ يدەيالارىن تاراتاتىن ينتەرنەت-رەسۋرستارعا قولجەتىمدىلىكتى شەكتەۋ قاجەت دەپ سانادى. مينيسترلىك اقپاراتتىق ورتانى، قازاق قوعامىنىڭ تاريحى مەن ءداستۇر ساباقتاستىعى، مەملەكەتتىڭ مادەني قۇندىلىقتارىن، سونداي-اق بالالاردى دۇرىس تاربيەلەۋ ماسەلەسىن جان-جاقتى ساراپتاپ، وسىنداي شەشىمگە كەلگەنىن ايتا كەتۋىمىز كەرەك.
«بالالاردى دەنساۋلىعى مەن دامۋىنا زيان كەلتىرەتىن اقپاراتتان قورعاۋ تۋرالى» زاڭىندا بالالارعا تىيىم سالىنعان اقپارات ەرەكشە سەكسۋالدىق جانە ەروتيكالىق سيپاتتاعى، قازاقستان رەسپۋبليكاسىنىڭ وزگە دە زاڭدارىمەن بالالار اراسىندا تارالۋىنا تىيىم سالىنعان مالىمەتتەردى قامتيدى.
سونىمەن قاتار «بالا قۇقىعى تۋرالى» زاڭدا پورنوگرافيالىق اقپاراتتى تاراتاتىن، بالالارعا زياندى اسەر ەتەتىن جانە قۇقىق بۇزۋشىلىق جاساۋعا ىقپال ەتەتىن بۇقارالىق اقپارات قۇرالدارىن پايدالانۋ دا زاڭمەن جاۋاپكەرشىلىككە تارتىلىپ، وسى مازمۇنداعى اقپاراتتى تاراتۋعا تىيىم سالىنعان»، دەلىنگەن مينيسترلىك حابارلاماسىندا.