ەلىمىزدەگى كەيبىر تاۋارلار كارتوننىڭ سەبەبىنەن قىمباتتاعان

بيىل وندىرىستە كارتون قولداناتىن كاسىپكەرلەردىڭ جۇمىسى ءبىرشاما تۇرالاپ قالدى.

قازاقستانعا شيكىزات رەسەي مەن قىتايدان يمپورتتالاتىندىقتان، باعا رۋبل مەن دوللاردىڭ باعامىنا بايلانىستى، دەپ حابارلايدى Almaty-akshamy.kz

ەلىمىزدە ءسۇت، ءتۇرلى سۋسىندار، كونديتەرلىك ونىمدەر، سىيلىقتار جانە تاعى باسقا قاتىرما قاعازبەن قاپتالاتىن ونىمدەر قىمباتتاپ جاتىر.

الماتىلىق كونديتەر ماريا رىشكوۆانىڭ ايتۋىنشا، كارتون باعاسىنىڭ وسۋىنە بايلانىستى بيىل ونىمدەرى 15 پايىزعا قىمباتتاعان.

«قاپتاما قىمباتتاپ جاتىر. ويتكەنى، وتاندىق ءوندىرىس جوق. وزىمىزدە قاعاز، كارتون، ءتىپتى پلاستيك تە وندىرىلمەيدى. بارلىعى سىرتتان كەلەدى. قاپتامالاردىڭ باعاسى قىمباتتاپ جاتقان سوڭ، ءبىز دە ءوز ءونىمىمىزدىڭ قۇنىن وسىردىك. تورتتى قاپتاماسىز ەشكىمگە بەرە المايسىڭ. تۇتىنۋشىلارعا ءتاتتى بۇلىنبەي جەتۋ ءۇشىن سىرتىندا قوراپ بولادى»، - دەيدى كونديتەرلىك سەحتىڭ ديرەكتورى ماريا رىشكوۆا.

تورتتاردى قاپتايتىن قوراپتاردىڭ ءارقايسىسى وسىدان ءۇش اي بۇرىن 35 تەڭگە تۇراتىن. ال، ءقازىر مۇنىڭ باعاسى ەكى ەسە كوتەرىلىپ، 70 تەڭگەگە دەيىن ءبىر-اق شىعىپتى. سايكەسىنشە، كاسىپكەرلەر ءتاتتىنىڭ قۇنىن دا شارىقتاتۋعا ءماجبۇر.

كارتوننىڭ قىمباتتاعانىنا باسپاحانالار دا شاعىمدانىپ وتىر. جىل باسىنان بەرى ماتەريالداردىڭ قۇنى ۇشتەن بىرگە وسكەن، ال باعا كۇن سايىن وزگەرىپ جاتىر.

قازاقستانعا شيكىزات رەسەي مەن قىتايدان يمپورتتالاتىندىقتان، باعا رۋبل مەن دوللاردىڭ باعامىنا بايلانىستى. ءقازىر كارتون مەن قاعازدىڭ كەيبىر تۇرلەرى لوگيستيكا، ياعني تاۋار تاسىمالداۋ قيىنداپ كەتكەندىكتەن، تاپشى بولىپ وتىر.