قازاقستان الەمنىڭ 180 ەلىمەن ساۋدا جاسايدى.
قاسىم-جومارت توقايەۆ ەلدەگى ينفلياسياعا نە اسەر ەتىپ وتىرعانىن ايتتى، دەپ حابارلايدى Almaty-akshamy.kz
«ءبىزدى شەتەلدىك ازىق-تۇلىك يمپورتىنىڭ جوعارى دەڭگەيى الاڭداتادى. بۇل ينفلياسيانىڭ وسۋىنە الىپ كەلەدى. ساراپشىلار قازاقستانداعى ينفلياسياعا سىرتقى فاكتورلار ىقپال ەتەتىنىن ايتىپ وتىر»، - دەدى پرەزيدەنت قازاقستاندا تىركەلگەن شەتەلدىك ديپلوماتيالىق ميسسيا باسشىلارىمەن كەزدەسۋدە.
توقايەۆ قازاقستان اشىق ەكونوميكا قاعيداتىنا بەرىك بولىپ قالا بەرەتىنىن اتاپ ءوتتى. ايتۋىنشا، رەسپۋبليكا الەمنىڭ 180 ەلىمەن ساۋدا جاسايدى. جاھاندىق ەكونوميكالىق قيىندىقتارعا قاراماستان، ەلدىڭ شيكىزاتتىق ەمەس ەكسپورتى شامامەن 40 پايىزعا ءوستى.
«ءبىز الداعى ۋاقىتتا دا ينۆەستيسيا تارتۋ بويىنشا ورتالىق ازياداعى كوشباسشىلىق پوزيسيامىزدى نىعايتا بەرەمىز. بيىلعى 6 ايدا شەتەلدىك سەرىكتەستەرىمىز ەلىمىزدىڭ ەكونوميكاسىنا شامامەن 15 ميلليارد اقش دوللارى كولەمىندە ينۆەستيسيا قۇيدى. بۇل بىلتىرعى وسى كەزەڭدەگى كورسەتكىشپەن سالىستىرعاندا 30 پايىزعا كوپ»، - دەدى پرەزيدەنت.
ايتۋىنشا، قازاقستان جىل سايىن 5 ملن توننادان استام بيداي مەن 1،5 ملن توننا ۇن ەكسپورتتايدى.
«الەمنىڭ ەڭ ءىرى ون استىق ەكسپورتتاۋشى ەلدەر قاتارىنا كىرەمىز. قازاقستان – زىعىر تۇقىمىن ءىرى وندىرۋشىلەردىڭ جانە مايلى داقىل ەكسپورتتاۋشىلاردىڭ ءبىرى. ءبىزدىڭ ستراتەگيالىق ماقساتىمىز – سالانىڭ ءوندىرىسىن 2،5 ەسە جانە ەكسپورتتى 2 ەسە ۇلعايتۋ»، - دەپ اتاپ ءوتتى مەملەكەت باسشىسى.