55 جاستاعى ك.ەسىمدى ازاماتشا الاياقتار توبىنىڭ قىلمىستىق جەلىسىنە ءتۇسىپ قالدى.
بەلگىلى بولعانداي، ايەل ادام ءبىر اپتاداي قىلمىسكەرلەردىڭ تالاپتارىن ورىنداپ كەلگەن. ول ولاردىڭ ءوزىنىڭ جيناعان اقشاسىن قورعاۋعا تىرىسىپ جاتقانىنا سەنىمدى بولعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«قاسكويلەر 21 قازاندا ۇيالى تەلەفون ارقىلى جابىرلەنۋشىگە قوڭىراۋ شالعانى انىقتالدى. ولاردىڭ ءبىرى ءوزىن بانك قىزمەتكەرىمىن، ەكىنشىسى پوليسەيمىن دەپ تانىستىردى. ەكەۋى دە ونىڭ شوتىنا بەلگىسىز بىرەۋلەر شابۋىل جاساعانىن ايتىپ، اقشانى ودان ءارى “ءقاۋىپسىز شوتقا” سالۋ ءۇشىن “بانك مامانىنا” تاپسىرىپ، ساقتاۋدى ۇسىنعان. سودان كەيىن ايەل ادام، بەيتانىس ادامعا 74 707 اقش دوللار مەن 1،3 ملن تەڭگە بەرگەن. كەلەسى كۇنى ك.ەسىمدى ازاماتشاعا تاعى دا “بانك قىزمەتكەرلەرى” تەلەفون سوعىپ، 2 ملن تەڭگە كولەمىندە نەسيە الۋعا كوندىرگەن. ايەل قاسكويلەردىڭ بۇل تالابىن دا ورىنداعان. تەك 1 قاراشادا عانا الاياقتاردىڭ قۇربانى بولعانىن ءتۇسىنىپ، پوليسياعا جۇگىنگەن»، – دەدى مەدەۋ اۋداندىق پوليسيا باسقارماسىنىڭ باستىعى داۋرەن وتەبايەۆ.
اتالعان دەرەك بويىنشا ق ر قك-نىڭ 190-بابى 4-بولىگى 2-تارماعى بويىنشا قىلمىستىق ءىس تىركەلدى. تەرگەۋ-جەدەل توبى قۇرىلدى.
«قابىلدانعان شارالار ناتيجەسىندە ءۇش ادام انىقتالىپ، ۇستالدى. ولار 24 جاستاعى س.ەسىمدى ازامات، 26 جاستاعى ا.ەسىمدى ازامات جانە 27 جاستاعى س.ەسىمدى رف ازاماتى. كۇدىكتىلەردىڭ جالعا العان كەڭسەسىندە 20 ۇيالى تەلەفون ءنومىرى جانە ءارتۇرلى ەكىنشى دەڭگەيلى بانكتەردە اشىلعان 52 بانك كارتاسى تابىلىپ، تاركىلەندى. جاۋاپ الۋ كەزىندە ۇستالعان ادامدار قاراجاتتى قولما-قول اقشاعا اينالدىرۋمەن، كريپتوۆاليۋتاعا ايىرباستاۋمەن اينالىساتىندارىن، بۇل ىستەن ءوز پايداسىن الاتىندارىن مويىندادى. قازىرگى ۋاقىتتا قىلمىستىڭ باسقا دا سىبايلاستارى، سونداي-اق باسقا دا ىقتيمال ەپيزودتاردى انىقتاۋ بويىنشا جەدەل جانە ارنايى ءىس-شارالار جۇرگىزىلۋدە. كۇدىكتىلەر قاماۋعا الىندى»، – دەدى وتەبايەۆ.
سونىمەن قاتار، الماتى قالاسىنىڭ پروكۋراتۋراسى وسىعان ۇقساس ەپيزودتاردى بولدىرماۋ ءۇشىن ازاماتتاردى ساقتىق پەن قىراعىلىققا شاقىرادى.