دوستىق ۇيىندە قازاقستان حالقى اسسامبلەياسىنىڭ «اسسامبلەيا تۆ» تەلەارناسىنىڭ تانىستىرىلىمى ءوتتى.
جيىندا ەتنومادەني بىرلەستىكتەردىڭ وكىلدەرى تەلەارنا كونتەنتى مەن مۇمكىندىكتەرىن تالقىلاپ، كورەرمەندەر سۇرانىسىنا وراي ۇسىنىستارىن ءبىلدىردى، دەپ حابارلايدى Almaty-akshamy.kz.
جالپى «اسسامبلەيا تۆ» تەلەارناسى وتكەن جىلدىڭ قىركۇيەك ايىنان باستاپ اقپارات جانە قوعامدىق دامۋ مينيسترلىگىنىڭ قولداۋىمەن كورەرمەنگە جول تارتتى. ول «قازاقتەلەكوم» اق تەلەكوممۋنيكاسيالىق كومپانياسىنىڭ پلاتفورماسىندا iD TV كابەلدىك تەلەديدار پاكەتىندە تاراتىلادى، سونداي-اق «TV+» ءموبيلدى قوسىمشاسىندا قولجەتىمدى.
«اسسامبلەيا تۆ» ماقساتى – قازاقستان حالقىنىڭ بىرلىگى مەن كەلىسىمىن قالىپتاستىرۋدا جەتەكشى تەلەارنا بولۋ. ال باستى مىندەتى ەتنومادەني بىرلەستىكتەردىڭ قىزمەتىن جانە ەتنو سالاسىنداعى مەملەكەتتىك ساياسات ماسەلەلەرىن جاريالاۋ بولىپ تابىلادى. تەلەارنا ۇلكەن مۇمكىندىكتەرگە جول اشپاق. اسىرەسە ەتنوسارالىق تاتۋلىقتى نىعايتاتىن مەملەكەتتىك ءتىلدىڭ ماڭىزىن ارتتىرۋعا سەپتىگىن تيگىزەتىنىنە سەنىمدىمىز»، – دەدى ەتنوسارالىق قاتىناستار كوميتەتىنىڭ مۇشەسى مەيىرجان نۇرادينوۆ.
تەلەارنا ەفيرىنەن قحا جاڭالىقتارى، مادەني، ويىن-ساۋىق باعدارلامالارى، قازاقستاندا تۇراتىن ەتنومادەني بىرلەستىكتەردىڭ ارنايى جوبالارى كورسەتىلەدى.
«تەلەارنا تەك ورتالىقتارمەن شەكتەلىپ قويماي، اۋىل-ايماقتارعا دا تاراتىلىپ، ونداعى تۇرعىندارعا قولجەتىمدى بولۋ كەرەك. ءتۇرلى ەتنوس وكىلدەرى وڭىرلەردە، اۋىلداردا تۇرادى. ءاربىر ۇلتتىڭ ءوز مادەنيەتى، ءسالت-داستۇرى بار، ولار وسى ارنا ارقىلى ناسيحاتتالۋى قاجەت»، – دەدى قازاقستان حالقى اسسامبلەياسى دەپۋتاتتىق توبىنىڭ مۇشەسى زاكىرجان كۋزييەۆ.
سونداي-اق جيىندا قىرعىز ەتنومادەني بىرلەستىگىنىڭ ءتوراعاسى شاۆكات يسمايلوۆ، استانا قالاسى قحا انالار كەڭەسىنىڭ مۇشەسى تۇرار ساتتار قىزى ارنا جۇمىسىنا قاتىستى ءبىرقاتار ۇسىنىستار ايتتى.