مەملەكەت باسشىسىنىڭ تاپسىرماسىن ىسكە اسىرۋ شەڭبەرىندە ەڭبەك جاعدايلارى زياندى جۇمىستا ۇزاق ۋاقىت بويى ىستەيتىن ادامداردى الەۋمەتتىك قورعاۋ دەڭگەيىن ارتتىرۋ ءۇشىن 2024 جىلعى 1 قاڭتاردان باستاپ ارناۋلى الەۋمەتتىك تولەم ەنگىزىلدى.
ارناۋلى الەۋمەتتىك تولەمدەردى تاعايىنداۋدىڭ مىندەتتى شارتتارى مىناداي: 55 جاسقا تولۋ جانە بجزق-دا كەمىندە 7 جىل كاسىپتىك زەينەتاقى اۋدارىمدارىنىڭ بولۋى، دەپ حابارلايدى Almaty-akshamy.kz.
ارناۋلى الەۋمەتتىك تولەم بىرنەشە كومپونەنتتەن تۇرادى جانە ءتورت قاراجات كوزىنەن جۇزەگە اسىرىلادى: رەسپۋبليكالىق بيۋدجەتتەن 2 ەڭ تومەن كۇنكورىس دەڭگەيى مولشەرىندە ارناۋلى كاسىپتىك جاردەماقى؛ ءومىردى ساقتاندىرۋ جونىندەگى كومپانيالاردان 1 ەڭ تومەن كۇنكورىس دەڭگەيى مولشەرىندە؛ جۇمىس بەرۋشىلەردىڭ قاراجاتى ەسەبىنەن 1 ەڭ تومەن كۇنكورىس دەڭگەيى مولشەرىندە، بجزق-دان مىندەتتى كاسىپتىك زەينەتاقى جارنالارى ەسەبىنەن. بۇدان باسقا، جۇمىسكەرلەرگە بجزق-داعى زەينەتاقى جيناقتارىن ەسكەرە وتىرىپ، مىندەتتى زەينەتاقى جارنالارى ەسەبىنەن تولەمدەر الۋ قۇقىعى بەرىلەدى.
الەۋمەتتىك كودەكسكە سايكەس جۇمىس بەرۋشىلەر كاسىپتەرى مەن قىزمەت تۇرلەرى ەڭبەك جاعدايلارى زياندى جۇمىستارمەن اينالىساتىن جۇمىسكەرلەردىڭ، وندىرىستەردىڭ، جۇمىستاردىڭ، كاسىپتەردىڭ تىزبەسىنە ەنگىزىلگەن جۇمىسكەرلەر ءۇشىن مىندەتتى كاسىپتىك زەينەتاقى جارنالارىن اۋدارادى، ولاردىڭ 2 مىڭنان استام پوزيسياسى بار. وسىلايشا، ارناۋلى الەۋمەتتىك تولەم ەكونوميكانىڭ 19 سالاسىندا، ونىڭ ىشىندە تاۋ-كەن ءوندىرۋ جانە وڭدەۋ ونەركاسىبىندە جانە باسقالارىندا جۇمىس ىستەيتىن قازاقستاندىقتارعا تيەسىلى بولادى.
تولەم زەينەتكەرلىك جاسقا دەيىن تولەنەدى. ارناۋلى الەۋمەتتىك تولەمدەردى الۋ ءۇشىن ەڭبەك جاعدايلارى زياندى جۇمىستارمەن اينالىسپاۋعا ءتيىس. جۇمىسكەرلەر جەڭىل جۇمىسقا اۋىسا الادى، سودان كەيىن ولار جالاقى مەن تولەم الادى نەمەسە دەمالىسقا شىعىپ، زەينەتكە شىققانعا دەيىن ارناۋلى الەۋمەتتىك تولەمدەر الادى.
ءبىرىڭعاي جيناقتاۋشى زەينەتاقى قورىنىڭ دەرەكتەرى بويىنشا ارناۋلى الەۋمەتتىك تولەمدى تاعايىنداۋ ءۇشىن مىندەتتى شارتتاردى ەسكەرە وتىرىپ، وعان 2024 جىلى 37 مىڭنان استام جۇمىسكەر، 2030 جىلى – 58 مىڭنان استام، 2035 جىلى – 95 مىڭنان استام جۇمىسكەر ۇمىتكەر بولا الادى. وسىلايشا، الەۋەتتى تولەم الۋشىلار سانى جىل سايىن ۇلعايادى.
الدىن الا دەرەكتەر بويىنشا، 2024 جىلى ارناۋلى الەۋمەتتىك تولەمنىڭ ورتاشا مولشەرى جالپى العاندا 208 مىڭ تەڭگەدەن اسادى. ءاربىر جۇمىسكەر ءۇشىن تولەم مولشەرى بجزق-داعى جيناقتارعا بايلانىستى بولادى. بۇل رەتتە جىل سايىن ارناۋلى الەۋمەتتىك تولەم مولشەرى ەڭ تومەن كۇنكورىس مولشەرىنىڭ ۇلعايۋىنا بايلانىستى وسەدى. الدىن الا ەسەپتەۋلەر بويىنشا 2030 جىلى تولەمنىڭ ورتاشا مولشەرى 339 مىڭ تەڭگەنى، ال 2035 جىلى – 519 مىڭ تەڭگەنى قۇرايدى.