بۇل تەحنولوگيانى ەۇۋ عالىمدارى ويلاپ تاپتى.
قازاقستاندا العاش رەت رادياسيالىق موديفيكاسيالانعان كابەلدەر شىعارىلادى، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
گۋميليەۆ اتىنداعى ەۋرازيا ۇلتتىق ۋنيۆەرسيتەتى جانىنداعى "يادرولىق تەحنولوگيالار پاركى" اق وندىرۋشىلەرمەن بىرلەسە رادياسيالىق-موديفيكاسيالانعان وقشاۋلاۋ قاباتى بار مۇناي-سۋاستى جانە فوتوۆولتايكالىق كابەلدەردىڭ العاشقى قازاقستاندىق ءوندىرىسىن جولعا قويۋدى جوسپارلاپ وتىر.
ەۇۋ عالىمدارى شەتەلدىك ارىپتەستەرىمەن بىرلەسە ينەرتتى ورتادا جوسپارلانعان وڭدەۋ تەحنولوگياسىنا وزگەرىستەر ەنگىزىپ، كابەلدىك ءونىمنىڭ پايدالانۋ قاسيەتتەرىن جاقسارتقان. بۇل ءوندىرىس ءادىسى ءبىزدىڭ ەلدە قولدانىلمايدى.
كابەلدەردىڭ باستى ارتىقشىلىعى – جوعارى تەمپەراتۋراعا توزىمدىلىك.
"كابەلدىك-وتكىزگىش ونىمدەرىن جاسايتىن جەرگىلىكتى وندىرۋشىلەر تەك وقشاۋلاعىش قاباتتى پەروكسيدتى بىرىكتىرۋ ءادىسىن قولدانادى. ءبىز "قازەلەكتروماش" جشس-مەن بىرلەسىپ، قازاقستاندا ءبىرىنشى بولىپ رادياسيالىق-موديفيكاسيالانعان وقشاۋلاۋ قاباتى بار كابەلدىك ءونىمنىڭ مۇناي-سۋاستى جانە فوتوۆولتايكالىق ءتۇرىن شىعارامىز. بۇل وقشاۋلاعىش پوليمەردەگى گەل-فراكسيانىڭ قۇرامىن ارتتىرادى جانە كابەل-وتكىزگىش ونىمدەرىنىڭ فيزيكالىق-مەحانيكالىق سيپاتتامالارىن - ىستىققا توزىمدىلىكتى (تەرىس جانە وڭ تەمپەراتۋرالارعا)، اگرەسسيۆتى ورتاعا توزىمدىلىكتى (ءسىلتىلى، قىشقىلدىق ورتا) جانە رادياسياعا توزىمدىلىكتى جاقسارتۋعا مۇمكىندىك بەرەدى"، - دەيدى "يادرولىق تەحنولوگيالار پاركى" اق ينجەنەر-فيزيگى، جوبا جەتەكشىسى ازات نۇرقاسىموۆ.
رادياسيالىق موديفيكاسيالانعان وقشاۋلاعىش قاباتى بار مۇناي-سۋاستى جانە فوتوۆولتايكالىق كابەل پايدالى قازبالاردى جانە بالامالى ەنەرگيا كوزدەرىن وندىرۋگە ارنالعان.
عالىمدار عىلىمي جوبانى كوممەرسيالاندىرۋدى جوسپارلاپ وتىر. ءوندىرىستى 2023 جىلدىڭ ءبىرىنشى جارتىجىلدىعىندا ىسكە قوسۋ كوزدەلگەن.