كەيىنگى ۋاقىتتا ۇشاققا مىنەمىن دەپ مۋزىكالىق اسپاپتارىن سىندىرىپ الۋ جاعدايلارى جيىلەگەن.
اسىرەسە، ەسترادا وكىلدەرى الەۋمەتتىك جەلىدە جازىپ، نارازىلىق بىلدىرۋدە. ياعني، دومبىراسىن نەمەسە گيتاراسىن جۇك سالعىشقا سالىپ، كەيىن قيراعان كۇيى الىپ جاتىر، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
«ەندى نە ىستەيمىز؟» دەگەن جىرمەن تانىلعان ايشولپان ەندى نە ىستەرىن بىلمەي ءجۇر. ۇشاققا مىنەمىن دەپ، دومبىراسىن ەكىنشى رەت سىندىرىپ العان.
«ءبىز سىندىرماي وزىڭىزگە تاپسىرۋعا ۋادە بەرەمىز دەپ دومبىراما اينەك دەگەندى جابىستىرىپ بەردى. الماتىدا دومبىرامدى كۇتىپ العاندا سىنىپ شىقتى مويىنى. دومبىرام ملن تۇرادى. ەندى ونى وتەي ما، وتەمەي مە، ءبىر قۇداي بىلەدى»، - دەيدى ايتىسكەر اقىن ايشولپان تولەۋتاي.
ءاندى اۋەلەتۋگە ارنالعان اسپاپتارىن اۋەگە اكەتە الماعانداردىڭ ءبىرى – ءانشى، روزا ءالقوجا. ول دا اۋە كومپانيالاردىڭ تالاپ-شارتىنا نارازى.
«استانادان-شىمكەنتكە ۇشايىن دەسەك، دومبىرا مەن گيتارانى الۋعا بولمايدى دەيدى قولعا. دومبىرانى الايىق، سىيادى عوي دەسەك، جوق بىزدە ونداي زاڭ جوق، جۇككە وتكىزەسىزدەر دەيدى. قالاي دەسەك، دومبىراعا 7 مىڭ، گيتاراعا 7 مىڭ تولە دەيدى»، - دەيدى ءانشى روزا ءالقوجا.
ۇشاققا جۇكتى قابىلداۋ ءتارتىبى ءار جەردە ءارتۇرلى. نەگىزگى ايىرماشىلىق – اسپاپتىڭ كولەمىندە.
«گيتارا، دومبىرا سياقتى اسپاپتاردى قول جۇگى رەتىندە راسىمدەۋگە بولادى. ارنايى فۋتليار ىشىندە بولعانى ابزال. ەگەر مۋزىكالىق اسپاپ ۆيولونچەل سياقتى ۇلكەن بولسا، جولاۋشى بيلەت الار كەزدە قوسىمشا اسپابى ءۇشىن قوسىمشا ورىن الۋ كەرەك»، - دەيدى اۋە كومپانياسىنىڭ مەنەدجەرى ەلۆيرا نۇربايەۆا.
جالپى، ەلىمىزدەگى اۋە كومپانيالارىنا جۇكتى، ونىڭ ىشىندە مۋزىكالىق اسپاپتاردى تاسىمالداۋعا قاتىستى ورتاق تالاپ نەمەس زاڭ جوق. ءار كومپانيا ۇشاقتارىنىڭ تەحنيكالىق مۇمكىندىكتەرىنە قاراي ءوز بەتىنشە شەشىم قابىلدايدى.
«ەگەر تاسىمالداۋ كەزىندە جولاۋشى قانداي دا ءبىر اقاۋدى انىقتاعان جاعدايدا، سول مەزەتتە اۆياكومپانيانىڭ وكىلىمەن بىرگە جۇكتىڭ اقاۋى تۋرالى ءتيىستى اكتىنى تولتىرۋ كەرەك. سول قۇجاتتىڭ نەگىزىندە شىعىندارىن تالاپ ەتۋگە قۇقىعى بار»، - دەيدى ق ر يندۋستريا جانە ينفراقۇرىلىمدىق دامۋ مينيسترلىگى حالىقارالىق اۋە قاتىناسىن رەتتەۋ باسقارماسىنىڭ باسشىسى ادىلەت كوبەنوۆ.