ەلىمىزدە ءتۇرلى ءيىستى تەمەكىلەردى ساتۋعا جانە تۇتىنۋعا تىيىم سالىنادى

قازاقستاندا ۆەيپتەردى ساتۋعا جانە تۇتىنۋعا تىيىم سالىنباق.

بۇل تۋرالى ءماجىلىس دەپۋتاتى امانجان جامالوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«قازاقستاندا ۆەيپتەردى ساتۋعا جانە پايدالانۋعا تىيىم سالاتىن تۇزەتۋلەر ەنگىزۋ تۋرالى شەشىم قابىلدادىق. تەمەكى قوسپاسى، سۇيىقتىق، گاز – ولاردى قازاقستاندا ساتۋعا جانە پايدالانۋعا تولىق تىيىم سالىنادى»، - دەدى دەپۋتات ءماجىلىس كۋلۋارىندا بەرگەن سۇحباتىندا.

ا. جامالوۆ قازاقستاندا ءقازىر قىزدىرىلاتىن تەمەكىگە (ايكوس، گلو) ەشقانداي سالىق سالىنبايتىنىن ءتۇسىندىردى.

«اعزاعا اسەرى، نيكوتين مولشەرى جانە باسقا پارامەترلەر بويىنشا بۇل ددسۇ تۇجىرىمىنا سايكەس، قاراپايىم تەمەكىمەن بىردەي زياندى. بۇگىن دەپۋتاتتار بۇل ستيكتەرگە اكسيز سالۋ شەشىمىن قابىلدادى. ولارعا كادىمگى تەمەكىگە سالىناتىن اكسيزدەردىڭ 70%-ى مولشەرىندە اكسيز ەنگىزۋ ۇيعارىلدى»، - دەدى ءماجىلىس دەپۋتاتى.

ودان بولەك، دەنساۋلىق ساقتاۋ تۋرالى كودەكسكە سۇيىق جانە گاز تۇرىندەگى تەمەكى قوسپالارى بار ەلەكتروندىق قۇرىلعىلار دەپ اتالاتىن ۆەيپتاردى ساتۋعا جانە پايدالانۋعا تىيىم سالۋ جونىندە تۇزەتۋ ەنگىزىلدى.

«ءتۇرلى ءيىستى تەمەكىلەردى قازاقستاندا ساتۋعا جانە تۇتىنۋعا تولىق تىيىم سالىنادى. سوندىقتان بۇل ۇعىمدار سالىق كودەكسىنەن الىنىپ تاستالدى»، - دەدى ا. جامالوۆ.