بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگى مالىمدەدى.
قازىرگى ۋاقىتتا قازاقستان نارىعىنداعى توعىز بانك بويىنشا تاراتۋ پروسەسى ءجۇرىپ جاتىر، دەپ حابارلايدى Almaty-akshamy.kz
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى ۇيىمدارىنىڭ قىزمەتىن رەتتەۋ جانە قارجىلىق كورسەتىلەتىن قىزمەتتەردى تۇتىنۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى «اشىق نقا» پورتالىندا جاريالاندى.
بەلگىلى بولعانداي، اگەنتتىك 2022 جىلدىڭ باسىنان بەرى ەكىنشى دەڭگەيلى بانكتەردىڭ باسشى قىزمەتكەرى لاۋازىمىنا 13 ۇمىتكەردى بەكىتۋدەن باس تارتقان.
«باعالى قاعازدار نارىعىندا 49 سۋبەكت جۇمىس ىستەيدى، بۇل رەتتە 2022 جىلدىڭ باسىنان باستاپ اگەنتتىك باسشى قىزمەتكەر لاۋازىمىنا 10 كانديداتتى كەلىسۋدەن باس تارتتى. ساقتاندىرۋ سەكتورىندا 26 ۇيىم جۇمىس ىستەيدى، 2022 جىلدان باستاپ ۋاكىلەتتى ورگان باسشى قىزمەتكەر لاۋازىمىنا 11 كانديداتتى كەلىسۋدەن باس تارتتى. ميكروكرەديت بەرۋ سەكتورىندا 252 ميكروقارجى ۇيىمىنىڭ ميكروقارجىلىق قىزمەتتى جۇزەگە اسىرۋعا ارنالعان ليسەنزياسى بار، بۇل رەتتە 2022 جىلدىڭ باسىنان باستاپ 17 كومپانيا ليسەنزياسىنان ايىرىلدى»، - دەلىنگەن قۇجاتتا.
سونىمەن قاتار قازاقستان رەسپۋبليكاسىنىڭ زاڭناماسىندا ارەكەتى نە ارەكەتسىزدىگى قارجى ۇيىمىن ماجبۇرلەپ تاراتۋعا نەمەسە ونى بانكروت دەپ تانۋعا اكەپ سوققان تۇلعالاردى اگەنتتىكتىڭ ەسەپكە الۋ مۇمكىندىگى كوزدەلمەگەن.
«وسىعان بايلانىستى وزگە قارجى ۇيىمدارىندا ولاردىڭ باسشىلىق لاۋازىمعا ورنالاسۋىنا جول بەرمەۋ ماقساتىندا وسى ادامداردىڭ ەسەبىن جۇرگىزۋ جانە باقىلاۋ جۇرگىزۋ ۇسىنىلادى. وسىلايشا، ۋاكىلەتتى ورگان جوسىقسىز ادامداردىڭ قارجى سەكتورىنداعى لاۋازىمدارعا ورنالاسۋىنا جول بەرمەۋ جونىندە شارالار قابىلداي الادى»، - دەلىنگەن قۇجاتتا.
قۇجاتتى قوعامدىق تالقىلاۋ 26 شىلدەگە دەيىن جالعاسادى.