ەلىمىزدە تاعى ءبىر قانت زاۋىتى ىسكە قوسىلادى

ءقازىر ەلدە 30 مىڭ توننا قانت قورى بار.

قازاقستاندا 2 قانت زاۋىتى تۇراقتى جۇمىس ىستەپ تۇر، مامىر ايىندا تاعى بىرەۋى ىسكە قوسىلادى، دەپ حابارلايدى Almaty-akshamy.kz

بۇل تۋرالى ق ر اۋىل شارۋاشىلىعى مينيسترلىگى اگرارلىق ازىق-تۇلىك نارىقتارى جانە اۋىل شارۋاشىلىعى ءونىمىن قايتا وڭدەۋ دەپارتامەنتىنىڭ ديرەكتورى نازگۇل حاتەپوۆا ءمالىم ەتتى.

«بۇگىندە ەلىمىزدە 30 مىڭ توننا قانت قورى بار. بۇل - ءوندىرۋشى زاۋىتتارداعى قانت كولەمىن ەسەپتەمەگەندە. قازىرگى ۋاقىتتا تاراز جانە كوكسۋ قانت زاۋىتى تۇراقتى جۇمىس ىستەپ تۇر. ودان بولەك، مامىر ايىندا مەركە قانت زاۋىتى ىسكە قوسىلادى دەپ وتىرمىز. وسىلايشا، 3 ءوندىرىس ورنى ىشكى نارىقتى قانتپەن تولىق قامتيدى» ، - دەدى نازگۇل حاتەپوۆا.

مينيسترلىك وكىلى كەلتىرگەن ستاتيستيكاعا سايكەس، ەلىمىزدىڭ جىل سايىنعى قانت تۇتىنۋ قاجەتتىلىگى - 530 مىڭ توننا.

«ونىڭ ىشىندە 380 مىڭ توننا يمپورتقا تيەسىلى. ەلىمىزگە ءونىمنىڭ 85 پايىزدان استامى رەسەيدەن كەلەدى. اتالعان ەلدىڭ قانتتى ەكسپورتتاۋعا شەكتەۋ قويۋى، ءبىزدىڭ نارىققا اسەرىن تيگىزدى. دەگەنمەن، ءبىز بۇعان دەيىن دە ايتقانبىز، قازاقستاندا قانت تاپشىلىعى جوق. سونىمەن قاتار، ءبىزدىڭ مينيسترلىك ەۋروپالىق ەكونوميكالىق كوميسسيامەن بىرلەسىپ، ەلىمىزگە سىرتتان قانتتى باج الىمىنسىز جەتكىزۋگە قوسىمشا كۆوتا ءبولۋ ماسەلەسىن قاراستىرىپ جاتىر» ، - دەيدى ول.