دەپۋتات ەكاتەرينا سمىشليايەۆا ۆەتەرينار مامانداردىڭ كاسىبي مەرەكەسىن بەكىتۋ كەرەكتىگىن ايتتى.
بۇگىن تومەنگى پالاتادا ۆەتەريناريا سالاسىن رەفورمالاۋ ماسەلەسى قارالىپ، ءماجىلىس دەپۋتاتتارى ۆەتەرينارلاردىڭ كاسىبي مەرەكەسىن ەنگىزۋدى ۇسىندى، دەپ حابارلايدى Almaty-akshamy.kz
«بۇگىندە كاسىبي مەرەكەلەر قاتارىندا ۆەتەرينار كۇنى جوق. وسىدان-اق ءبىزدىڭ جانە مەملەكەتتىڭ ۆەتەرينار ماماندىعىنا دەگەن قارىم-قاتىناسىن بايقاۋعا بولادى. مىسالى، قارجىگەر مەن ەسەپشىلەردىڭ بىرنەشە مەيرامى بار. ال مال دارىگەرىنىڭ اتاۋلى كۇنى جوق. سوندا بۇيرىققا جازىلاتىن ون بەس ءارىپتى اياپ وتىرمىز با؟» - دەدى سمىشليايەۆا.
ايتۋىنشا، وعان ەشقانداي شىعىن شىعارۋدىڭ قاجەتى جوق. دەمالىس كۇنى دە ەنگىزىلمەيدى.
«وسىنى جاساساق، ۆەتەرينارلارعا جاعىمدى جاڭالىق بولادى. ولار ەلدىڭ ازىق-تۇلىك جانە جانۋارلار قاۋىپسىزدىگىن قامتاماسىز ەتىپ وتىر عوي»، - دەپ تۇيىندەدى دەپۋتات.
اۋىل شارۋاشىلىعى ءمينيسترى ەربول قاراشوكەيەۆ دەپۋتاتتىڭ ۇسىنىسىن قولدادى. ونىڭ ايتۋىنشا، الداعى ۋاقىتتا مينيسترلىك ءبىرقاتار ۆەدومستۆولىق ناگرادانى بەكىتۋدى جوسپارلاپ وتىر. وعان «قۇرمەتتى ۆەتەرينار» اتاعى دا ەنگىزىلەدى.
«كاسىبي مەرەكەنى دە بارىنشا قولدايمىز. ءتيىستى ۇسىنىستار ەنگىزەمىز»، - دەپ اتاپ ءوتتى قاراشوكەيەۆ.