استانا — ششۋچينسك باعىتى بويىنشا 3.24 «ەڭ جوعارى جىلدامدىقتى ساعاتىنا 60 شاقىرىمعا شەكتەۋ» جول بەلگىلەرى قويىلدى، دەپ حابارلايدى aqshamnews.kz.
ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆانىڭ مالىمەتىنشە، قاڭتار ايىندا ەلىمىزدە كوپتەگەن ءىرى جول اپاتى تىركەلدى.
— اۋا رايىنىڭ وزگەرۋى جولداعى قاۋىپسىزدىككە ايتارلىقتاي اسەر ەتۋى مۇمكىن. سوندىقتان بەلگىلەنگەن نورمالار مەن قاعيدالاردى ساقتاۋ وتە ماڭىزدى. قاڭتار ايىنىڭ وزىندە ءىرى جول اپاتتارى تىركەلدى. نەگىزگى سەبەپ — كورىنۋ مۇمكىندىگىنىڭ تومەندەۋى كەزىندە ءقاۋىپسىز جىلدامدىقتى ساقتاماۋ، — دەپ اتاپ ءوتتى ول.
اعا ينسپەكتور اتاپ وتكەندەي، ەكى رەسپۋبليكالىق ماڭىزى بار جولعا شەكتەۋ قويىلدى.
— سوندىقتان ازاماتتاردىڭ ءومىرى مەن دەنساۋلىعىنا ءقاۋىپ توندىرمەۋ ءۇشىن كولىك اعىنى كوپ جول ۋچاسكەلەرىندە جىلدامدىقتى شەكتەۋ تۋرالى شەشىم قابىلداندى. اتاپ ايتقاندا، استانا — ششۋچينسك جانە استانا — قاراعاندى باعىتتارى بويىنشا 3.24 «ەڭ جوعارى جىلدامدىقتى ساعاتىنا 60 شاقىرىمعا شەكتەۋ» جول بەلگىلەرى قويىلدى. ولار ناشار كورىنۋ، كوكتايعاق نەمەسە باسقا دا اۋا رايى فاكتورلارى جاعدايىندا عانا قوسىلادى. كوكتايعاق، بوران، تۇمان نەمەسە جالپى قولايسىز اۋا رايى جاعدايلارى تۋرالى حابارلامادان كەيىن بۇزۋشىلىقتاردى تىركەۋ كامەرالارىنىڭ پارامەترلەرى كورسەتىلگەن جىلدامدىققا وزگەرتىلەدى. اۋا رايىنىڭ ناشارلاۋى تۋرالى ەسكەرتۋلەردە، سونداي-اق «ياندەكس»، «2GIS»، «Indrive» جانە باسقا دا قوسىمشالاردا ەنگىزىلگەن جىلدامدىق شەگى تۋرالى اقپارات كورسەتىلەدى. جولداردى اشۋ كەزىندە شەكتەۋلەر الىنىپ تاستالادى، — دەپ ءتۇسىندىردى بورانوۆا.
بۇل رەتتە ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى جول ەرەجەسىن قاتاڭ ساقتاۋدى ەسكەرتتى.
— ءبىز بارشاڭىزدى جول ەرەجەلەرىن قاتاڭ ساقتاۋعا جانە اۋا رايىنىڭ وزگەرۋىن ەسكەرۋگە شاقىرامىز. ءسىزدىڭ جانە اينالاڭىزداعى ادامداردىڭ قاۋىپسىزدىگى جولداعى قىراعىلىعىڭىز بەن جاۋاپكەرشىلىگىڭىزگە بايلانىستى ەكەنىن ەسكە سالعىم كەلەدى. جىلدامدىقتى اسىرماڭىز، جولدا سابىرلىق پەن تۇسىنىستىك تانىتىڭىز. بىرلەسىپ قانا ءبىز جولدارىمىزدى ءقاۋىپسىز ەتە الامىز! — دەدى ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.