جىل سايىن ەلىمىزدە 800-گە جۋىق ورمان جانە دالا ورتتەرى تىركەلەدى.
بۇل تۋرالى ق ر توتەنشە جاعداي مينيسترلىگى ورتكە قارسى قىزمەت كوميتەتىنىڭ ءتوراعاسى نۇربولات دەربىسوۆ ايتتى، دەپ حابارلايدى قازاقپارات ءتىلشىسى.
«قازگيدرومەتتىڭ بولجامى بويىنشا، بيىلعى ءۇشىنشى توقساندا اۋا تەمپەراتۋراسى ورتاشا +30ºس-قا دەيىن جەتەدى، ال رەسپۋبليكانىڭ وڭتۇستىك، شىعىس جانە باتىس بولىكتەرىندە قۇرعاقشىلىق پەن جاۋىن-شاشىن تاپشىلىعىمەن اۋا تەمپەراتۋراسى +40ºس-قا دەيىن كوتەرىلەدى دەپ بولجانۋدا. مۇنىڭ ءبارى ورمان قورىنداعى ءورت ءقاۋپىن ەداۋىر ارتتىرادى»، - دەدى ن. دەربىسوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
تابيعي ءورت سەبەپتەرىن تالداۋ كورسەتكەندەي، ءورت تۇتانۋىنىڭ تەك 43%-ى تابيعي قۇبىلىستاردان، نايزاعاي رازريادتارىنان بولسا، 50%-دان استامىنا ادامي فاكتور سەبەپ بولعان.
«وسىعان بايلانىستى، تجم اكىمدىكتەرمەن جانە جەرگىلىكتى پوليسيا قىزمەتىمەن بىرلەسىپ، حالىقتىڭ ورماندار مەن دالا القاپتارىنداعى قاۋىپسىزدىك تالاپتارىن ساقتاۋى، اۋىل شارۋاشىلىعى ۇيىمدارىنىڭ ءورت قاۋىپسىزدىگى قاعيدالارىن ورىنداۋىن قامتاماسىز ەتۋ ماسەلەسىن ەرەكشە باقىلاۋعا الدى. بارلىق وڭىرلەردە كەڭ اۋقىمدى الدىن الۋ ءىس-شارالارى جۇرگىزىلۋدە»، - دەدى نۇربولات دەربىسوۆ.
بۇعان دەيىن ق ر توتەنشە جاعدايلار مينيسترلىگى ورتكە قارسى قىزمەت كوميتەتى ءتوراعاسىنىڭ ورىنباسارى دميتريي تيتوۆ الاكول جاعالاۋىنداعى اۋقىمدى ءورتتىڭ ءمان-جايىن ايتقان ەدى.