ەلىمىزدە سۋتەگىمەن جۇرەتىن پويىزدار پايدا بولۋى مۇمكىن

اكسيونەرلىك قوعامنىڭ باسقارما ءتوراعاسى نۇرلان ساۋرانبايەۆ «New Silk Way» حالىقارالىق كولىك-لوگيستيكالىق بيزنەس-فورۋمىندا وسىنداي مالىمەت ايتتى.

«اۋە مەن تەڭىز كولىگىنە قاراعاندا قورشاعان ورتاعا زياندى شىعارىندىلاردى 8 ەسە از تاستايتىنىنا قاراماستان، تەمىرجول سالاسىندا جەتىلدىرۋ قاجەت تۇستار جەتەرلىك. 2027 جىلدان باستاپ «قازاقستان تەمىرجولى» جاسىل سۋتەگىمەن جۇرەتىن لوكوموتيۆتەر ساتىپ الا باستايدى.

ياعني، ءبىزدىڭ لوكوموتيۆتەر پاركى جاسىل ەنەرگەتيكاعا باسىمدىق بەرەتىن بولادى. وعان دەيىن گازبەن جۇرەتىن لوكوموتيۆتەر ساتىپ الماقشىمىز. وتكەندە ول تۋرالى دا كەلىسىمدەرگە قول قويدىق. گاز دا جاسىل تەحنولوگياعا جاتادى. ياعني، جاسىل تەحنولوگيا لوگيستيكا سالاسىنا كەلىپ جاتىر. ءىرى كومپانيالارمەن كەلىسسوز جۇرگىزگەندە جوبانىڭ قۇنىمەن بىرگە جۇكتىڭ ءار تونناسىنا قانشا شىعارىندى كەلەتىنى ناقتى جازىلادى. ءىرى كومپانيالاردىڭ ءبارى لوگيستيكالىق ءونىم ساتقاندا مىندەتتى تۇردە كومىرتەگى ءىزىن كورسەتىپ وتىرادى. بۇل – ۋاقىتتىڭ پارمەنى»، - دەدى ول.

كومپانيا باسشىسى قازاقستان اۋماعىمەن جۇك تاسىمالداعىسى كەلەتىن ءىرى كومپانيالار ونلاين باقىلاۋ جۇيەسىنىڭ جەتىلمەگەنىنە ساقتىقپەن قارايتىنىن ايتادى.

«ءبىزدىڭ سالا ءۇشىن سيفرلاندىرۋ دا ماڭىزدى. ويتكەنى ءىرى كومپانيالارمەن سويلەسكەندە ولاردىڭ ايتاتىنى بار. «قازاقستان اۋماعىنا كىرگەن ساتتەن باستاپ جۇگىمىزدى كورۋدەن قالامىز. قاي جەردە كەتىپ بارا جاتقانى نەمەسە تۇرعانى بەيمالىم بولىپ كەتەدى»، - دەگەندى ايتادى. سوندىقتان وسىنداي تەحنولوگيالاردى بەرەتىن الەمنىڭ ءىرى كومپانيالارىمەن جۇمىس ىستەپ جاتىرمىز. ازەربايجان، گرۋزيا، وزبەكستان تاراپىمەن وسى سيفرلىق ءدالىزدى ءبىرىزدى ەتىپ قۇرۋعا ۋاعدالاسىپ جاتىرمىز»، - دەيدى نۇرلان ساۋرانبايەۆ.

جالپى الەمدەگى تاسىمال تىزبەگىنىڭ بۇزىلۋى «قازاقستان تەمىرجولى» ءۇشىن قولايلى جاعداي تۋعىزعان ۇقسايدى.

«كەيىنگى ءۇش جىلدا بىزدە تاريحي كورسەتكىشتەر تىركەلىپ كەلەدى. ياعني، ءبىز جىل سايىن قازاقستان تەمىرجولىنىڭ ەڭ جوعارى كورسەتكىشتەرىن جاڭارتىپ وتىرمىز. بيىل دا سولاي بولاتىن ءتۇرى بار. 9 ايدىڭ قورىتىندىسى بويىنشا جۇك اينالىمى 7 پايىز وسكەن. نەگىزگى ءوسىم ترانزيت ەسەبىنەن بولىپ تۇر. ءتارنزيتتىڭ ءوز ءوسىمى – 25 پايىز. بۇل وتە جاقسى كورسەتكىش جانە قازاقستان ترانزيتتىك ەل رەتىندە قالىپتاسقانىن ايعاقتايدى»، - دەيدى قتج باسشىسى.

ايتا كەتەيىك، پرەزيدەنت قاسىم-جومارت توقايەۆتىڭ اقش-قا ساپارى اياسىندا «قازاقستان تەمىر جولى» ۇك» اكسيونەرلىك قوعامى مەن Wabtec اراسىندا ستراتەگيالىق ىنتىماقتاستىق تۋرالى نەگىزدەمەلىك كەلىسىمگە قول قويىلعان بولاتىن.  «استانا» حالىقارالىق قارجى ورتالىعىنىڭ باسقارۋشىسى رەنات بەكتۇروۆتىڭ ايتۋىنشا، امەريكالىق لوكوموتيۆ ءوندىرۋشى كومپانيا Citibankء-تىڭ قارجىلاندىرۋى ارقىلى ارقىلى ەلىمىزدە 240 جاڭا لوكوموتيۆ جاساماق. مامىلەنىڭ قۇنى 900 ملن دوللارعا تەڭ.

كەلىسىم «قازاقستان تەمىر جولى» كومپانياسىنىڭ 15 پايىزعا جۋىق لوكوموتيۆىن جاڭالاۋعا مۇمكىندىك بەرەدى.