الماتىدا ۇرمەلى اسپاپتار بويىنشا شەبەرلىك سىنىبى ءوتتى

الماتىدا ۇرمەلى اسپاپتاردا ورىنداۋشىلارعا ارنالعان حالىقارالىق اكادەميا ءوز جۇمىسىن قورىتىندىلادى.

بەس كۇن بويى فرانسيانىڭ، قازاقستاننىڭ، جاپونيا مەن اقش-تىڭ جەتەكشى وقۋتىشىلارى وسى اسپاپتاردى مەڭگەرسەم دەگەن قازاق مۋزىكانتتارىنا شەبەرلىك ساباعىن وتكىزدى، دەپ حابارلايدى Almaty-akshamy.kz 24.kz-كە سىلتەمە جاساپ.

اكادەميانىڭ ماقساتى ارتىستەردىڭ حالىقارالىق ساحناعا شىعۋىنا جول اشۋ. بۇل شارا  ءۇش جىلدان بەرى  مادەنيەت جانە اقپارات مينيسترلىگىمەن جامبىل اتىنداعى قازاق مەملەكەتتىك فيلارمونياسىنىڭ باستاماسىمەن ءوتىپ كەلەدى. ونىڭ  جوعارى دەڭگەيدە ۇيىمداستىرىلۋىنا قولداۋ كورسەتكەندەردىڭ قاتارىندا «باتىرحان شۇكەنوۆ» اتىنداعى قوعامدىق قور دا بار. بيىل اكادەمياعا قاتىسۋعا 100-گە جۋىق مۋزىكانت ءوتىنىش بەرگەن. سونىڭ تەك جارتىسى ىرىكتەۋدەن ءوتتى. تالاپ بويىنشا  14 جاستان 45 جاسقا دەيىنگى كاسىبي ورىنداۋشىلار مەن ستۋدەنتتەر قاتىسۋعا مۇمكىندىك الدى. بىلىكتى وقىتۋشىلار ءدارىس وقۋمەن قاتار، گالا كونسەرتتە ونەر كورسەتتى.

«مادەني ورتادا بۇل مۋزىكالىق كەشتىڭ ماڭىزى وتە زور. ەۋروپادا مۇنداي وقۋ وتە قىمبات تۇرادى. ءبىز تالانتتاردى ىزدەپ تابۋ ءۇشىن، ولارعا قولداۋ كورسەتۋ ءۇشىن ءبارىن تەگىن ۇيىمداستىرىپ وتىرمىز. ءتىپتى ىرىكتەۋدەن وتپەگەن قاتىسۋشىلارعا شەبەرلىك ساباعىن تىڭداۋعا مۇمكىندىك بەردىك. ال اكادەميا قاتىسۋشىلارى سەرتيفيكات الادى. پەداگوگتاردىڭ قاتارىندا جيۋلەن ليۋكا،  بەنۋا كۋتريس، جاسۇلان ابدىقالىكوۆ، حەنري ۋيلليفورد جانە يو ماتسۋشيتا سىندى مىقتى ماماندار بار»، - دەيدى  جامبىل اتىنداعى قازاق مەملەكەتتىك فيلارمونياسىنىڭ ءارتيسى ەرجان قوشانوۆ.